Со ваквата мерка, како што посочија од Министерството за здравство, се олеснува административниот товар и се намалува притисокот врз секундарното и терциерното здравство, а за тоа, како што додаваат, сведочат и бројот на пациенти и рецепти препишани кај матичен лекар за една недела
За една седмица, матичните лекари во земјава издале вкупно 5 412 рецепти за хронична терапија на над 2 000 пациенти со хронично заболување, информираат денеска од Министерството за здравство (МЗ).
Ова е во рамки на реформската мерка во примарната здравствена заштита, со која терапијата за хроничните болести, која досега ја препишуваа специјалисти, отсега ќе ја препишуваат матичните лекари.
Ваквата мерка, посочуваат од Здравство, е суштинска новина со која се унапредува процесот на обезбедување здравствени услуги за пациентите и за здравствените работници, а дополнително се зајакнува улогата и на матичните лекари во здравствениот систем и се намалува притисокот врз секундарното и терциерното здравство.
„За таа цел, е донесен нов правилник, со кој се опфатени пациентите со дијабетес, астма, ХОББ, намалена функција на тироидна жлезда и хипертензија, кои сега наместо кај лекар специјалист, хроничната терапија ја добиваат кај својот матичен лекар во местото на живеење“,
се вели во соопштението на Министерството.
Оттаму посочуваат дека во тек се и подготовки за воведување нови лабораториски испитувања со кои на матичните лекари ќе им се овозможи да ја зајакнат нивната улога и во дијагностичка насока.