Денешните аудио снимки се доказ дека Христијан Мицкоски имал средби, разговори и директна соработка со Зоран Милески Кичеец и дека за тоа ја лажеше целата јавност, изјави денеска генералниот секретар на СДСМ Љупчо Николовски на прес-конференција.
„Мицкоски и Кичеец, активно и директно комуницирале, очи в очи, на средби но и преку телефон. Не преку „Петко-Станко“ како што самиот Мицкоски вели на објавената снимка, туку сосема директно. Кичеец бил извршител на Мицкоски и одбработувал за ВМРО-ДПМНЕ, активно ја помагал ВМРО-ДПМНЕ и работел во функција на ВМРО-ДПМНЕ. Мицкоски го ангажира Кичеец во изборни цели за претседателските и локалните избори во Охрид во 2019 година“,
рече Николовски, додавајќи дека снимките фрлаат вистинско светло на случајот „Рекет“ и води директно до тн. бел дворец, до ВМРО-ДПМНЕ и до Христијан Мицкоски.
Николовски смета дека тие може да бидат основ и за постапки поврзани со изборен криминал.
„Денеска, на дело се докажува спрегата на Мицкоски со тајкуни блиски до ВМРО-ДПМНЕ. Само се потврдува зошто Мицкоски работи против правната држава, зошто ги брани криминалите на Никола Груевски, на режимот и зошто правеше се во овој период наместо да се реформира , да ги блокира и да ги спречи сите реформи во правосудството. Очекуваме целосно расчистување на овој скандал и одговорност, согласно законите, за сите инволвирани во овој случај, вклучително и на оние од белиот дворец и ВМРО-ДПМНЕ“,
рече Николовски, во врска со аусдиоснимките.
По прес-конференцијата на Николовски, реагираа од опозициската ВМРО-ДПМНЕ, кои преку соопштение обвинија дека, како што пишуваат „ Зоран Заев е криминалецот број еден, а Љупчо Николовски е неговиот конселиере и затоа тој излегува да го брани неговиот криминал“, нарекувајќи ги денешните аудиобомби – петарда на СДСМ.
„Петардата на СДСМ буквално испука без звук. Доколку Љупчо Николовски и СДСМ сакаат да ја дознаат вистината за милионскиот рекет нека го прашаат Зоран Заев, тој го менаџирал и прикривал криминалот. Боки 13 кажа, знаел уште пред 3 април, а пријавил на 22 април. Што правел Заев од 3 април до 22 април!? Со кого се договорал и што договарал!? Николовски и Заев можат да ја прашаат Дескоска, која ако држи до законот ќе им каже дека прикривањето на криминал е криминал, кој се казнува согласно закон. Самиот факт што Заев го известил Боки 13 говори дека или биле заедно, или му оставил доволно време да уништи, прикрие и измени докази,
се наведува во соопштението на ВМРО-ДПМНЕ, како реакција на изјавата на генералниот секретар на СДСМ.
Денеска на каналот Јутјуб на корисник со име „Facts and Figures“ беа објавени 4 аудиоснимки на кои меѓудругите се слуша и гласот на лидерот на ВМР-ДПМНЕ Христијан Мицкоски како со Зоран Милески Кичеец договарале соработка за избори во Охрид и во други делови од Западна Македонија.
Мицкоски во интервју за „Макфакс“ во октомври 2019 г. тврдеше дека не се видел со Кичеец. Кичеец пак ја потврди автентичноста на снимките.