„Може да се предизвика штета со оглед на тоа што институциите мора да го имаат својот континуитет. Мора да се работи на подобрување на законските решенија, онаму каде што се гледа дека има одредени проблеми“, вели таа
Одговорноста мора да биде индивидуална со посочување на оние што се огрешиле пред законот. Колективна одговорност не може да има. Ова го изјави претседателката на Советот на јавни обвинители Душица Димитриевска, по најавите на владејачката ВМРО-ДПМНЕ, уште во предизборната кампања, за распуштање на Советот и реформи во делот на изборот на неговите членови.
Амбасадорите, пак, посочија дека тоа би можело да значи мешање во судската власт.
„Може да се предизвика штета со оглед на тоа што институциите мора да го имаат својот континуитет. Мора да се работи на подобрување на законските решенија, онаму каде што се гледа дека има одредени проблеми. Меѓутоа, колективна одговорност не може да има. Одговорноста мора да биде индивидуална, со посочување на оние што се огрешиле пред законот“,
вели Димитриевска.
Претседателката на Судскиот совет, Весна Дамева, пред два дена во изјава рече не ја поддржува тезата на колективна одговорност и смета дека таа треба да биде детектирана и санкционирана индивидуално.
„Како правник, пред сѐ, не ја поддржувам тезата на колективна одговорност, сепак мојот личен став е дека треба да има индивидуална одговорност и таа да биде точно детектирана и санкционирана. Секоја одговорност има име и презиме, нека се детектира и секој нека си сноси индивидуална санкција, ако нешто сторил противзаконски, го нарушил угледот и интегритетот на Судскиот совет, донел одлука под влијание на разни емоции и слично“,
рече Дамева
Таа укажа на некои последици доколку биде донесен нов закон за Судски совет. Дамева вели дека во периодот од распуштање до конституирање нов Судски совет ќе настане еден вакуум-период, во кој постои опасност да застарат некои дела.
Правен нихилизам можеби е атрактивен, но не и најефективен метод – вели шефот на Делегацијата на Европската Унија, Дејвид Гир, во интервју за „360 степени“, прашан за ставот на ЕУ за најавата од новата влада за распуштање на Судскиот и на Советот за јавни обвинители.
За Гир, нема дилеми дека мора да има суштински реформи во областа на владеење на правото и судството и затоа го поздравува фактот што „владата е амбициозна во овој мандат да го стави високо на листата приоритети“.
Што се однесува до Судскиот совет и Советот на јавни обвинители, се дообјаснува амбасадорот, „веќе има богатство на материјал што покажува кои се начините за придвижување“.