Полското Министерство за надворешни работи, исто така, соопшти дека се обратило до Обединетите нации (ОН) за поддршка во напорите земјата да добие компензација за претрпените загуби кои Варшава ги проценува на околу 1,3 билион долари за време на окупацијата на Германија од 1939 до 1945 година
Полска вчера соопшти дека Германија ја информирала оти нема намера да влезе во преговори за какви било репарации за Варшава од Втората светска војна бидејќи смета дека прашањето е затворено.
Полското Министерство за надворешни работи, исто така, соопшти дека се обратило до Обединетите нации (ОН) за поддршка во напорите земјата да добие компензација за претрпените загуби кои Варшава ги проценува на околу 1,3 билион долари за време на окупацијата на Германија од 1939 до 1945 година.
Официјален Берлин, пак, досега во неколку наврати рече дека прашањето за репарациите поврзани со војната е затворено со одлуката донесена во времето на комунизмот, кога Варшава се откажа од барањето репарации.
„Овој одговор, сумирано, покажува апсолутно непочитување кон Полска и Полјаците. Германија не води пријателска политика кон Полска. Тие сакаат тука да ја градат својата сфера на влијание и да ја третираат Полска како вазална држава“,
изјавил Аркадиуш Муларчик, заменик-министер за надворешни работи на Полска, во интервју за полска новинска агенција, пренесе Ројтерс.
Тој додал дека натамошниот дијалог со Германија во врска со барањето на Полска ќе продолжи преку меѓународните организации.
Повеќе од шест милиони Полјаци, вклучително и три милиони полски Евреи, ги загубија животите во Втората светска војна, а главниот град Варшава беше срамнет со земја по бунтот во 1944 година во кој загинаа 200 илјади цивили.
Во 1953 година полските комунистички лидери се откажаа од финансиските побарувања од Германија под притисок на СССР, кој сакаше да ја ослободи Источна Германија од репарации.
Откако ја презеде власта во Полска во 2015 година, владејачката националистичка партија Право и правда бара воени репарации од Берлин и тврди дека тогашниот договор е неважечки бидејќи Полска во тоа време не можела да преговара за правична компензација.