Од направеното секвенционирање на вкупно 152 позитивни примероци на SARS-CoV-2, во 104 од нив (68 проценти) е детектиран сојот oмикрон
Пријавени се 946 реинфекции, со зголемување од седум пати во однос на претходната недела
За период од една седмица, за 51 процент е зголемен бројот на позитивни на ковид, а заболени лица се од сите возрасни групи, соопшти денеска Министерството за здравство.
Најзастапени се возрасните групи на лица на возраст од 30-39 (27 проценти), 20-29 (24 проценти) и 40-49 (17 проценти). Најмал број е регистриран кај возрасната група од 0-9 (2 процента).
Во период од една недела, односно од 3 до 9 јануари, пријавени се 946 реинфекции, со зголемување од седум пати во однос на претходната недела.
Во лабораторијата за вирусологија и молекуларна дијагностика на ИЈЗ, во периодот од 05-10.01.2022, направено е секвенционирање на вкупно 152 позитивни примероци на SARS-CoV-2, а во 104 од нив (68 проценти) е детектирана oмикрон варијантата. Омикрон варијантата е откриена во 12 градови и тоа: Скопје – 48, Охрид – 27, Кочани – седум, Тетово – шест, Велес – пет, Пехчево, Штип, Гевгелија, Кавадарци по два и Виница, Неготино, Битола по еден заразен.
Според извештаите од болниците, наведуават од МЗ, моментално на територија на цела држава се хоспитализирани 351 лице што е 41 процент повеќе во споредба со претходна недела. Од вкупниот број хоспитализирани пациенти, 156 се во Скопје на КИБФС, ТБЦ и ГОБ 8 Септември. Во останатите болници низ државата хоспиталзиирани пациенти има во Битола, Штип, Велес, Куманово, Охрид, Прилеп, Струга, Кичево, Кавадарци и Струмица.
Зголемен е бројот на дневни прегледи во инфективните одделенија низ болниците во државата, а во болниците во Скопје надминува и 100 пациенти. Според епидемиолошките анкети најголем дел од пациентите имале контакт со позитивен случај три дена пред почетокот на симптоми/добивање на позитивен резултат, соопштуваат од Министерството за здравство.
Во последните 24 часа направени се 5 165 теста, а регистрирани се 813 нови случаи на ковид-19, информираше Министерството за здравство.
Иако бројката на новозаразени за разлика од повеќето денови изминатото деноноќие е под илјада, сепак процентот на позитивни од вкупниот број тестирани е најголем во последните четири дена и изнесува 15,7 отсто.