Покрај моменталните временски прилики, како една од причините за појава на грип лекарите го наведуваат загадениот воздух кој, како што велат, влијае вирусите полесно да се шират и да опстојуваат
Во текот на последната недела од 2022 година, во земјава се пријавени вкупно 347 случаи на заболени од грип или заболувања слични на грип, што е 96 отсто повеќе во споредба со неделата пред неа, објави Институтот за јавно здравје (ИЈЗ) во неделниот извештај за состојбата со грип во периодот од 26 декември до 1 јануари.
Во моментов на Инфективната клиника во најголем број случаи се хоспитализираат повозрасни лица, лица со хронични болести кои се третираат со соодветна терапија. Што се однесува до ковид позитивните случаи на Инфективната клиника, хоспитализирани се десет пациенти, дел од нив се на кислородна поддршка.
И покрај зголемиот број на пациенти со грип, инфектолозите повикуваат на смиреност бидејќи состојбата со болни пациенти е вообичаена за зимскиот период од годината.
Покрај моменталните временски прилики, како една од причините за појава на грип лекарите го наведуваат загадениот воздух кој, како што велат, влијае вирусите полесно да се шират и да опстојуваат.
Лекарите препорачуваат пациентите да консумираат витамини и топли напитоци, да се јаде овошје и зеленчук, а за своите симптоми да се консултираат со доктор и да не се земаат лекови на своја рака, особено не антибиотици без препорака на лекар.