За една недела (16-22 ноември) ДСЗИ издал 14 664 решенија за изолација и домашно лекување на лица со ковид и лица кои биле во контакт со позитивно лице, додека овој месец вкупно досега се издадени речиси 40 000 вакви решенија, соопшти денеска Инспекцискиот совет, кој ги обединува сите инспекторати во земјава.
Државниот пазарен инспекторат, пак, во текот на изминатата недела извршил 3 463 контроли и 553 надзори во врска со материјалните закони и со здравствените протоколи за работа на угостителските објекти и поднел 27 прекршочни пријави.
Споредено со претходниот месец, како што рече претседателката на Советот Магдалена Филиповска-Грашкоска, се забележува намалување на прекршувањата на ковид-протколите кои произлегуваат од Законот за заштита на населението од заразни болести.
„За споредба, во октомври, кога инспекторите немаа надлежности да забрануваат вршење дејност поради непочитување на ковид-протколите од вкупно извршени 6 963 надзори и 6 123 контроли беа изречени 37 кривични пријави против угостителски објекти кои не ги почитувале протоколите, а во ноември, по донесување на измените на законот, констатирани се неправилности кај пет угостителски објекти“,
рече Филиповска-Грашкоска.