Инаку, заклучно со 27 јуни, во Република Северна Македонија се регистрирани вкупно 826 случаи на заболени од голема кашлица
Нови 40 случаи на пертусис или голема кашлица се пријавени во периодот од 21 до 27 јуни, што се еден помалку споредено со претходниот седумдневен период. Од новите случаи, како што информира директорот на Институтот за јавно здравје (ИЈЗ), Шабан Мемети, 11 се хоспитализирани, објави МИА.
Во однос на географската дистрибуција на случаите, според најновиот извештај на ИЈЗ, најголем дел од нив се пријавени во Скопје, односно 27 или 67,5 отсто.
„Пријавени се и осум случаи од Битола, три од Тетово и два нови случаи од Ресен. Возраста на заболените се движи од еден месец до 42 години“,
се наведува во извештајот.
Најголем број од новопријавените случаи, односно 20, се од возрасната група од нула до четири години, што е половина од вкупниот број на регистрирани случаи во последните седум дена
„Во однос на вакциналниот статус на заболените, 27 лица се некомплетно вакцинирани, невакцинирани или имаат непознат вакцинален статус, шест се комплетно вакцинирани и седум се вакцинирани согласно возраст“,
информираат од Институтот за јавно здравје, пренесува државната новинска агенција.
Инаку, заклучно со 27 јуни, во Република Северна Македонија се регистрирани вкупно 826 случаи на заболени од голема кашлица, со инциденца од 45 на 100 000 жители.
„Тоа претставува неколкукратно зголемување на бројот на заболени во однос на изминатиот петгодишен период (2019-2023 година), кога се регистрирани вкупно 10 случаи. Дистрибуцијата на случаите по однос на место на живеење покажува дека најголем број лица живеат во Скопје – 648, со опфатени 17 општини. Во рамките на епидемијата во Куманово се пријавени 49 заболени лица, а случаи се пријавени и во други 20 градови низ државата“,
се наведува во извештајот.