Во март годинава, пак, во однос на февруари, имало намалување на цените кај дел од храната, а најголемо од 4 отсто имало кај рибата и морските плодови
Споредено, пак, со март минатата година, најголем скок од 14 отсто има кај цените на кафето, чајот и какаото, а цените на безалкохолните пијалаци пораснале за 12 отсто
Државниот завод за статистика (ДЗС) денеска соопшти дека трошоците за живот во март годинава во однос на истиот месец лани бележат зголемување од 2,7 отсто, а цените на мало од 2,2 отсто.
Во однос на февруари, трошоците за живот во март биле намалени за 1,3 отсто.
Како што информираат од ДЗС, намалувањето на инфлацијата во март во однос на февруари е резултат на помалите трошоци за животот за храна и безалкохолни пијалаци, транспорт, мебел, покуќнина и одржување на домаќинствата, алкохолни пијалаци, тутун и наркотици и разновидни стоки и услуги.
Храната и безалкохолните пијалаци во март биле поевтини за три отсто, а алкохолните пијалаци и тутунот за 0,5 проценти.
Од храната најголемо намалување од 4 отсто имало кај рибата и морските плодови, по нив се месото и зеленчукот кои биле поевтини за 3,8 отсто, а потоа се млекото, сирењето и јајцата кај кои намалувањето е за 3 отсто. Лебот и житата биле со цени пониски за 2,9 отсто.
Според извештајот на ДЗС, во оваа група, најголемо поскапување во март во однос на февруари имало кај овошјето и тоа за 3,8 отсто.
За мебел, покуќнина и одржување на домаќинствата во март се плаќало 0,6 отсто помалку отколку во февруари, а за 1,8 отсто помалку се плаќало и за транспорт.
Во март имало зголемување на трошоците за живот во категориите домување, облека и обувки, ресторани, комуникации, здравје и рекреација и култура.
За домување, вода, електрика, гас и други горива во март се плаќало повеќе за 0,4 проценти, а за исто толкав процент поскапи биле и облеката и обувките. Во рестораните и хотелите во март било поскапо за 0,3 отсто, а за здравје се плаќало повеќе за 0,2 проценти. Најмало поскапување имало за рекреација и култура и тоа било за 0,1 процент.
Трошоците на животот за образование во март останале на исто ниво како и во претходниот месец.
Споредено, пак, со март минатата година, најголем скок од 14 отсто има кај цените на кафето, чајот и какаото, а цените на безалкохолните пијалаци пораснале за 12 отсто.
Цената на маслото за една година бележи пораст од 10 отсто. Овој март во споредба со тој во 2024 година, поскапи се и овошјето и зеленчукот и тоа за 5,2, односно 3,4 отсто.
Според податоците од ДЗС, цената на основните производи како млекото, сирењето и јајцата за една година пораснала за 2,6 отсто, а на месото за 0,8 проценти.