Од отворањето на градинките на 9 септември до денеска во градинките биле регистрирани 15 деца и 44 вработени позитивни на коронавирус. Во моментов 44 вработени и околу 190 деца се во изолација. Според епидемиолозите, децата не се заразиле во градинките, туку дома.
„Здравствената состојба на сите им е добра. Голем дел од нив се излезени од изолација, голем дел и од воспитувачите и негувателите завршиле со изолација и се враќаат на своите работни места“,
изјави денеска министерката за труд и социјална политика Јагода Шахпаска одговарајќи на новинарско прашање.
Во врска со информациите за заболени вработени во градинки во општините Ѓорче Петров и Карпош и за голем број деца во изолација, Шахпаска рече дека за тоа кој ќе оди во изолација по регистриран случај на позитивен на коронавирус одлучуваат епидемиолозите врз основа на епидемиолошка анкета.
„Не е изненадувачки доколку некој воспитувач или негувател е позитивен, во изолација да одат и цели групи до 15 деца, бидејќи во групите од три до шест години има до 15 деца“,
објасни таа.
Во врска со информациите за позитивни случаи на вработени и поголем број деца во изолација во градинката „Росица“, Шахпаска рече дека тоа е градинка со три објекти и бројката од 44 изолирани деца е вкупна бројка од трите различни објекти.