Со укинувањето на бесплатните тестови, оние кои не се вакцинирани сега ќе треба да плаќаат два пати неделно за тест ако сакаат да добијат ковид-пропусница. Оваа пропусница од денеска е задолжителна за пристап до сите места во затворени простории и на отворено, каде што можат да се соберат повеќе од 10 луѓе
Од денеска Владата на Кипар го укинува бесплатно тестирање за коронавирус со брзи тестови за да ја промовира вакцинацијата. Паралелно со тоа, се зголеми и бројот на места каде на невакцинираните им се бара потврда за негативен тест или за прележан ковид-19.
Брзите тестови, кои досега бесплатно ги даваше Министерството за здравство, сега ќе ги плаќаат граѓаните. Максималната цена што ја постави Министерството е 10 евра.
„Државата обезбедува бесплатна вакцина за сите граѓани и, откако ќе имаат можност да се вакцинираат, нема да им требаат брзи тестови. Но, бидејќи тие самите одлучија да не ја примат вакцината, сметаме дека нивна должност е да платат за брзи тестови“,
порача министерот за здравство Михалис Хаџипанделас.
Досега, кипарската влади плати 26 милиони евра за брзи тестови, а само во последните две недели беа направени речиси 885 000 брзи тестирања.
Со укинувањето на бесплатните тестови, оние кои не се вакцинирани сега ќе треба да плаќаат два пати неделно за тест ако сакаат да добијат ковид-пропусница. Оваа пропусница содржи доказ дека некој е вакциниран, дека прележал ковид-19 или дека има негативен тест во последните 72 часа. Таа од денеска е задолжителна за пристап до сите места во затворени простории и на отворено, каде што можат да се соберат повеќе од 10 луѓе.
Бесплатното тестирање ќе остане да важи само за одредени групи, како што се малолетници или луѓе кои од различни медицински причини не можат да се вакцинираат.