Во врска со „Отворен Балкан“, српскиот претседател изјавил дека не го интересира што мислат поединци на Запад за таа иницијатива, ако таа е добра за Србија, Северна Македонија и за Албанија
Српскиот претседател Александар Вучиќ изјави дека Србија е подготвена да ги испрати своите хеликоптери за гасење пожари доколку Скопје процени дека тоа е потребно, што и се предвидува во рамки на иницијативата „Отворен Балкан“.
Како што пренесува МИА од Белград, Вучиќ изјавил дека не го интересира што мислат поединци на Запад за таа иницијатива, ако таа е добра за Србија, Северна Македонија и за Албанија.
„Доколку има потреба да се помогне во гасењето на пожарите, ние веќе донесовме одлука и се согласивме да ги испратиме нашите хеликоптери, бидејќи можат да носат 1 200 литри вода. Се надевам дека сега ситуацијата е многу подобра“,
изјави Вучиќ.
Српскиот претседател одговараше на прашањето дали има реакции од најмоќните западни земји на иницијативата „Отворен Балкан“ и што му кажал за таа иницијатива на германскиот државен секретар Мигел Бергер, кој ги посети Белград, Приштина и Сараево.
„Имавме сеопфатни разговори, имаме различни позиции по прашањето на Белград и Приштина и не апсолутно исти и за прашањето за ‘Отворен Балкан’. Не би сакал да ги коментирам причините, но ми се чини дека тие на сите им се јасни. Но, ние нема да се откажеме од она што претставува суштина на европските вредности и слободи, а тоа е слободата на движење на луѓето и протокот на стоки, услуги и капитал“,
изјави Вучиќ, посочувајќи дека тоа се политички и економски вредности кои придонесуваат за раст на секоја од нашите земји и оти се потпишани добри договори.