Советот на СОНК вчера соопшти дека за членството не е прифатлив предлогот на Владата за 10 проценти покачување на платите со кој би се прекинал штрајкот, кој започна на 11 април
Несериозно е да се ставаат во ризик и да им се прави штета во личниот развој на децата кои треба да го продолжат образованието, да се запишат во средните училишта, да полагаат матура и да се запишат на факултетите во земјава и странство, велат од Владата
Штрајкот во училиштата и градинките низ државава што го организира Самостојниот синдикат за образование, наука и култура (СОНК) продолжува.
Советот на СОНК вчера соопшти дека за членството не е прифатлив предлогот на Владата за 10 проценти покачување на платите со кој би се прекинал штрајкот, кој започна на 11 април.
„Зголемувањето на платите од 10 проценти во детската заштита, основното и средно образование воопшто не кореспондира со висината на зголемување на минималната плата оваа година и не е соодветна стимулација за враќање на достоинството на професијата“,
соопшти претседателот на СОНК, Јаким Неделков, на прес-конференција по седницата на Советот на СОНК, вчера, чие членство бара зголемување на платите за 18,4 проценти и нивно усогласување со минималната плата.
За СОНК е неприфатливо тоа што добиле устен предлог за 10 процентно зголемување на платите, односно 95 проценти од синдикалните организации се изјасниле за отфрлање на таквата понуда.
Неделков пренесе дека членовите на СОНК констатирале дека ваквиот пристап од страна на Владата не води во правец на брзо решавање на проблемот и прекинување на штрајкот. Сепак, како што рече, Советот на СОНК е подготвен да има интензивни и рационални преговори со Владата на кои би се усогласиле спорните прашања и би се потпишала спогодба, како би можело во најкраток можен рок да продолжи воспитно-образовниот процес.
Според Неделков, учениците нема да бидат скратени од понудата и можност да надоместат за тоа што сега го имаат изгубено во тек на штрајкот. Предвидена е, појасни, скратена наставна програма со која наставната содржина ќе се реализира во целост во позбиена форма или со поголема динамика.
„Имаме искуство, сме работеле и друг пат во такви услови и за време на пандемијата кога наставните часови беа 30 минути, а требаше истата содржина да се реализира во рамки на 30 минути. Досега наставниците имаат изгубено зависи кој наставен предмет, еден, два или три, евентуално пет наставни часа ако е математика или јазик меѓутоа секој од наставниците знаат како тоа да го надоместат“,
рече Неделков, одговарајќи на новинарски прашања.
Од Владата, пак, во реакцијата на објавата од СОНК, порачаа дека е неодговорно и покрај понуденото решение за раст на платите во образованието и детската заштита и воспитание да се продолжи со штрајкот и да се руши веќе воспоставениот образовен процес во услови кога се соочуваме со економска и здравствена криза. Оценија дека одбиената понуда за 2 500 денари покачување на платата значи дека СОНК ги става личните интереси пред оние на децата.
Синдикатот, велат од Владата, треба да има верба во институциите, бидејќи и претходно низ партнерски дијалог беше постигнато зголемување на платите на наставниците и на вработените во градинките од 21 процент.
„Најдобриот интерес на децата треба да ни е на прво место, бидејќи правото на образование на секое дете е уставно загарантирано право. Учениците треба да се вратат во училиштата, таму каде што припаѓаат. Со продолжувањето на штрајкот и одбивањето на понудата на Владата, со која се отвора простор за трајно решавање и подобрување на стандардот на вработените во образованието, ризикот за продолжување на училишната година е особено извесен. Во овој контекст, несериозно е да се ставаат во ризик и да им се прави штета во личниот развој на децата кои треба да го продолжат образованието, да се запишат во средните училишта, да полагаат матура и да се запишат на факултетите во земјава и странство“,
велат од Владата.
Оттаму најавија дека согласно Законот за работни односи и Колективниот договор за основно и средно образование, и за вработените во јавните установи за згрижување и воспитание на деца од предучилишна возраст, на вработените кои штрајкуваат ќе им се исплатат само придонесите на платите. Ова, според Владата, произлегува од одлуката на СОНК да организира и одржува генерален штрајк за унапредување на правата на работниците, а во периодот од шест месеци од донесувањето односно зголемувањето на минималната плата. Законската обврска за усогласувањето е шест месеци од донесувањето, односно зголемувањето на минималната плата и Владата, а министерствата и СОНК сѐ уште преговараат во овој законски предвиден рок.
Министерот за образование и наука Јетон Шаќири, претходно на Фејсбук истакна дека губењето на настава во услови како оваа пандемија, кога Владата и тие прават максимални напори да го нормализираат образовниот процес, не оди во прилог никому, најмалку на учениците.
„Потребни сте им сега во овој период кога се подготвуваат за продолжување на образованието во средните училишта, за полагање на стручни испити и за државната матура, од што зависи нивната понатамошната образовна иднина и запишување на факултетите во земјава и во странство. Со нарушен образовен процес, сето ова не може да се реализира во предвидените рокови и е на штета на сегашните деветтоодделенци и матуранти, но и на сите останати ученици“,
напиша министерот Шаќири.
Со апел за прекинување на штрајкот и постигнување договор вчера се огласи и министерката за труд и социјална политика, Јованка Тренчевска, кој ги повика воспитувачите и негувателите да го нормализираат воспитно-згрижувачкиот процес и да ги прифаќаат децата во градинките. Таа потенцираше дека секој изгубен час и ден од наставата оди на директна штета на раниот детски развој, кој е основата за понатамошен развој на секоја индивидуа. Во уште еден пст на Фејсбук по одлуката на СОНК да го продолжи штрајкот, таа праша: Дали СОНК ќе ги надомести платите на наставниците, професорите воспитачите и негувателите, зошто Законот им дава таква можност? Или раководството на СОНК плата ќе си земат ама за членството ќе нема?
„Законот за работни односи кој го регулира правото на штрајк и надоместокот на плата за време на штрајк, како и Колективните договори кои СОНК ги има потпишано во образование и во детска заштита уредуваат дека за време на штрајк, на работниците кои штрајкуват работодавачот исплаќа придонеси на плата на најниската основица за исплата на придонеси, а нето плата може да им исплати организаторот на штрајк. Дали СОНК ќе ги надомести платите на наставниците, професорите воспитачите и негувателите, зошто Законот им дава таква можност? Или раководството на СОНК плата ќе си земат ама за членството ќе нема? Членарина плаќа секој член, секој месец од плата има задршка за СОНК. Солидарно и праведно е сега кога штрајкуват, платата да им ја надомести организаторот на штрајкот, СОНК!“,
порача министерката Тренчевска.
Реакции и пораки за штрајкот и вчера упатија и политичките партии.
Од опозициската ВМРО-ДПМНЕ побараа, како што наведоа во соопштение, Владата наместо да им се заканува на наставниците да ги покачи платите согласно барањата на СОНК.
„Владата мора да го нивелира коефициентот на сложеност на работните места во образованието со минималната плата и да изврши зголемување на платите“,
истакнаа од ВМРО-ДПМНЕ.
Од владејачката СДСМ, пак, истакнаа дека правото на штрајк е уставно загарантирано, нонагласија дека наставниците треба да се водат и од интересите на нивните ученици.
„Наставата мора да продолжи да се одвива непречено, особено поради фактот што зад нас имавме две училишни години во падемија кога учениците следеа онлајн или комбинирана настава. Владата предводена од СДСМ покажа вистинска грижа за образованието како клучен сектор во нашето општество. Тоа се гледа преку зголемените плати кои за четири и пол години ги зголемивме од 3 200 до 6 400 денари, како и преку сериозните инвестиции во подобрување на условите за работа на наставниот кадар“,
велат од СДСМ и апелираа СОНК да го продолжи дијалогот, наставата да продолжи и се најде решение кое е во интерес на наставниците.
Од Владата во петокот соопштија дека се отворени за дијалог за постигнување систем за раст на платите кој нема да биде условен и предизвикуван од штрајкови и незадоволства и со кој ќе се обезбеди модел за раст на платите во јавниот сектор, кој како со договорот за минималната плата, ќе се врзе за порастот на просечната плата и со порастот на трошоците за живот.