Заболениот бил на туристичко патување во Тунис, а за време на престојот, како што кажал, забележал комарци во поголем број и бил каснат, иако користел репеленти во поголем дел од периодот при престојот
Втор случај на заразен со Западно-нилска треска регистрира Институтот за јавно здравје. Во извештајот, како што се посочува од ИЈЗ, станува збор за 34-годишен жител на Кочани. Според пријавата кај лекарите, првичните симптоми кај пациентот почначе со висока температура , треска, малаксаност, болки во мускулите, главоболка и колапс, при што паднал и добил исеченици на главата и рацете.
„Поради перзистирање на фебрилноста, на 09.07.2024 година, пациентот е трансфериран во инфективното одделение при ЈЗУ Клиничка болница – Штип. Земени се примероци за микробиолошки анализи на повеќе причинители. Со серолошко испитување е добиен податок за присуство на антитела кон причинителот WNV од вирусолошката лабораторија при ИЈЗ, односно потврдено е заболувањето Западно-нилска треска. Пациентот бил хоспитализиран во ЈЗУ Клиничка болница – Штип во периодот од 09-15.07.2024 година и е испишан во добра здравствена состојба“,
се наведува во извештајот.
Заболениот бил на туристичко патување во Тунис, а за време на престојот, како што кажал, забележал комарци во поголем број и бил каснат, иако користел репеленти во поголем дел од периодот при престојот.
Во регионот на Кочани е исто така забележано присуство на комарци. Согласно информацијата од надлежниот епидемиолог, спроведена е редовна дезинсекција, информираат од ИЈЗ.
Во текот на 2024 година се пријавени вкупно два лабораториски потврдени случаи на Западно-нилска треска во државата. Првиот случај, што е исто така импортиран, беше регистриран во април кај жител на општината Василево, на територијата на Центарот за јавно здравје – Струмица.
Периодот на инкубација за ова заболување вообичаено трае од 3 до 14 дена. Од ИЈЗ информираат дека околу 80% од инфекциите кај луѓето поминуваат без манифестација на симптоми. Останатите 20% симптоматски инфекции, најчесто се манифестираат како треска која поминува сама од себе, а помалку од 1% од инфекциите се развиваат во сериозни форми, со тешка клиничка слика и се потенцијално смртоносни (пр. воспаление на мозокот, воспаление на мозочните обвивки или појава на парализи).
Не постои специфична терапија, а третманот главно е насочен кон лекување на симптомите.