Врховниот суд, постапувајќи по жалбите на обвинетиот и на Обвинителството во предметот со сообраќајната несреќа кај Универзална сала, во која животот го загуби Фросина Цековска, донесе пресуда со која жалбата на обвинетиот ја одби како неоснована, а жалбата на Основното јавно обвинителство Скопје ја уважи во делот на кривичната санкција.
Со ова Врховниот суд ја преиначи пресудата на Апелациониот суд Скопје и обвинетиот го осуди на казна затвор во траење од 4 години, додека во останатиот дел второстепената пресуда ја потврди.
Претходно, Апелацискиот суд Скопје донесе пресуда врз основа на признание на вина со која обвинетиот го огласи како виновен за кривично дело – тешки дела против безбедноста на луѓето и имотот во сообраќајот од член 300 став 2 во врска со член 297 став 1 од Кривичниот законик и го осуди на казна затвор во траење од 3 години, а на обвинетиот му изрече и забрана за управување со моторно возило од Б-категорија во траење од една година.
„Направените сообраќајни пропусти кои се причина за сообраќајната незгода опфатија умисленост во дејствијата на обвинетиот, односно беше утврдено присуство на алкохол во крв и пречекорување на дозволената брзина за управување со возилото, па согласно тие пропусти обвинителството ја определи и правната квалификација за кривичното дело. На пресудата на Апелациониот суд во конкретниот предмет, претходеше пресуда на Основниот суд Скопје 1 Скопје со која обвинетиот за наведеното кривично дело беше огласен виновен и казнет со казна затвор во траење од 4 години и му беше изречена забрана за управување со моторно возило од Б-категорија во траење од една година“,
се наведува во соопштението од Јавното обвинителство.
Сообраќајната незгода се случи во април 2015 година на булеварот „Партизански одреди“ во Скопје, во близина на Универзална сала, кога обвинетиот, управувајќи со моторно возило под дејство на алкохол и со брзина поголема од ограничената, удрил во Фросина Цековска, која како пешак започнала да го минува коловозот по обележан пешачки премин. Од ударот таа се здобила со тешки телесни повреди и починала на самото место.