Универзитетската професорка Маја Бојаџиевска во областа на воспитанието и образованието, писателот Милован Стефановски, сликарот Мирослав Масин и актерот Рефет Абази во областа на културата и уметноста
Универзитетската професорка Маја Бојаџиевска во областа на воспитанието и образованието, писателот Милован Стефановски, сликарот Мирослав Масин и актерот Рефет Абази во областа на културата и уметноста се добитниците на државната награда „Св. Климент Охридски“ за 2024 година.
„Луѓето од културата, од уметноста, од образованието и воспитанието, чии личности и дела денес ги чествуваме со оваа највисока државна награда, се најдобрите гаранти за тоа заедничко напредување во и на нашата држава и култура“,
истакна Томислав Османли, претседателот на Одборот за доделување на признанието.
Во име на добитниците на наградата се заблагодари професорката од УКИМ, Маја Бојџиевска, која во својот говор го нагласи нееднаквото вреднување на придонесот на жените во овие области и побара тие да го добијат заслуженото место во општеството.
Наградата им ја посвети на, како што рече, сите невидливи претходнички затоа што таа е единствената жена меѓу вкупно осум добитници што годинава ги добија наградите „Св. Климент Охридски“ и „11 Октомври“.
„Зарем навистина мислите дека е тоа реалната слика за постигнувањата на жените во нашата средина? Зарем тоа што мене ми беше делегирана задачата да се заблагодарам со овој говор може делумно или симболички да се покрие суштинскиот придонес на жените во овие општествени полиња? Тоа, се разбира, мора да се промени не само со најтешката од сите задачи, онаа што се вика промена на свеста, туку со умни, активни, прогресивни политики, базирани на силна убеденост, базирани на искреност, на градење целосно инклузивен систем на вредности“,
истакна професорката Бојаџиевска.
Државната награда „Св. Климент Охридски“ е највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност од јавен интерес на Република Северна Македонија.