Околу стотина вработени истражители, службеници и административни кои останаа во СЈО сепак нема да ги добијат заостанатите придонеси. Уставниот суд на денешната седница одлучи да ја поништи Уредбата на Владата со која се предвидуваше исплатата на заостанатите придонеси за вработените и трошоци за комуналните услуги.
Одлуката следува откако на една од претходни седници, уставните судии решија да поведат постапка за оценување на уставноста на оваа Уредба и времено да ја запрат до конечната-денешна одлука.
Проблемот со исплатата на трошоците започна по оставката и разрешувањето на специјалната јавна обвинителка Катица Јанева, која е обвинета во случајот „Рекет“, бидејќи таа беше единствена овластена да ги потпишува налозите.
Вработените во текот на изминатата зима најавија дека размислуваат и за тужба кон државата откако не можеше да им се исплати декемвриската плата и здравственото осигурување за 2019 година.
Потоа, Владата во текот на вонредната состојбата донесе Уредба со законска сила за исплата на трошоци, што наиде на критика од страна на опозициската ВМРО-ДПМНЕ. Владата, пак, посочуваше дека подобро е да се исплатат заостанатите трошоци сега отколку вработените да ја тужат државата и потоа тоа да се прави по судски пат со камата.
Пред Уставен да ја поништи одлуката, побара мислење од Владата која, пак, предложи да биде отфрлена иницијативата за поништување, но сепак уставните судии одлучија да ја поништи.
Кога станува збор за обвинителите кои беа дел од СЈО, тие уште од септември лани, со одлука на Советот на јавни обвинители се вратени на работа во матичните обвинителства.