„Нашите барања се едноставни, а тоа е усогласување на нашите плати со минималната плата, носење вредносен бод за да се знае од 1 јуни колкави ќе ни бидат платите и разрешување на Управниот одбор во целосен состав“, вели Бранко Аџигогов, претседател на Синдикалната организација на Фондот за здравствено осигурување
Вработените во Фондот за здравствено осигурување (ФЗО) денеска одржаа предупредувачки штрајк против Управниот одбор на оваа установа, со барање за усогласување на нивните плати согласно Законот за минималната плата.
Ова денеска го соопшти Бранко Аџигогов, претседател на Синдикалната организација на Фондот за здравствено осигурување, посочувајќи дека доколку до 15 мај не биде донесена одлука по нивните барања ќе започнат секој ден во сите градови по еден до два часа ќе одржат предупредувачки протести, а од 1 јуни ќе стапат во генерален штрајк.
„Вработените во Фондот за здравствено осигурување денеска одржува предупредувачки штрајк против Управниот одбор на оваа установа затоа што на минатата седница нашата точка за усогласување на платите со растот на минималната плата беше одложена за после завршување на изборите, односно до формирање влада. Изминатиот период вработените во ФЗО штрајкуваа со цел да им остане истата плата. Времената одлука што ја донесе Владата е дека платите ни остануваат исто до 31 мај. Времето се ситни, остануваат 30 дена без да знаеме колкава плата ќе имаме. Треба да се донесе Одлука за усогласување на платата, како и вредноста на бодот по 1 јули, па затоа сакаме да го предупредиме составот на Управниот одбор да не не држи во неизвесност повеќе и да седне да си ја сработи работата. Самите изјавиле дека немаат намера да донесат никаква одлука во следниот период. Останува отворено прашањето зошто Управниот одбор воопшто постои“,
рече Аџигогов.
Доколку до 15 мај не е реши нивното прашање, Аџигогов најави дека ќе започнат со секојдневни предупредувачки протести во секој град по еден до два часа, како и дека на 1 јуни стапуваат во генерален штрајк.
„Нашите барања се едноставни, а тоа е усогласување на нашите плати со минималната плата, носење вредносен бод за да се знае од 1 јуни колкави ќе ни бидат платите и разрешување на Управниот одбор во целосен состав“,
вели тој.
Според него, во Управниот одбор на ФЗО има тројца члена кои се веќе пензионери и со тоа, како што рече, се нарушува духот на законот.
„Управниот одбор се поставува согласно Законот за здравствено осигурување. Таму членуваат седум лица, од кои двајца се повереници на државата, едниот од Министерство за финансии, другиот од Министерството за здравство со годишно ротирање. Сите други се претставници на Лекарската комора, на Сојузот на синдикати, на Здружението на пензионери. Од тие седум лица, предвидено е едно лице да биде пензионер, со цел да се грижи за правата на пензионерите. Во моментот веќе три лица се пензионери и е нарушен духот на законот. Немаме ништо против тие лица, но законодавецот предвидел поделбата да биде таква, а тоа не треба да се прекршува“,
вели претседателот на Синдикалната организација на ФЗО.
Аџигогов рече дека станува збор за усогласување од 2 392 денара по лице, пари кои, како што рече, изгледаат малку, но додаде и дека тоа е законска обврска која мора да биде исполнета.
„Имаат 30 дена да одлучат. После 31 мај немаме бод, немаме плата и не знаеме за што работиме. Од 1 јуни работиме за нула. Таков е законот“,
рече тој.
Вработените во Фондот за здравство на почетокот на февруари годинава излегоа на штрајк кој траеше неколку дена, со барање платите во текот на оваа година да им останат во истиот износ како онаа што ја добиле за декември минатата година со утврденото зголемување од 15 проценти.
Штрајкот во февруари уследи по протест што се одржа една недела претходно, а на кој вработените во ФЗО го изразија своето незадоволство од можното намалување, односно, како што рекоа тогаш од синдикатите, препораката на Владата за намалување на платите за 21 процент.
По три дена штрајк, тој беше ставен во мирување откако од раководството на Фондот соопштија дека со Владата донеле одлука платите да останат со еднаква вредност до 31 мај, до донесување трајно решение.
Инаку, буџетот на ФЗО е над 46 милијарда денари и од него за плати се издвојуваат 1,19 проценти.