Оваа одлука Судот ја донел по произнесување на осомничениот во присуство на неговиот бранител во однос на предлогот на Јавното обвинителство
Судија на претходна постапка вечерва донесе решение со кое го прифати предлогот на ЈО и на осомничениот 22-годишен возач кој вчера ја прегази 24-годишната девојка кај „Сити мол“ и тешко повреди уште едно лице му определи мерка притвор во траење од 30 дена поради постоење на опасност од бегство, влијание на сведоци и можност да го повтори делото, соопшти Основниот кривичен суд.
Оваа одлука Судот ја донел по произнесување на осомничениот во присуство на неговиот бранител во однос на предлогот на Јавното обвинителство.
Основното јавно обвинителство во Скопје претходно денеска отвори истрага против возачот поради основано сомнение дека ги сторил кривичните дела – Тешки дела против безбедноста на луѓето и имотот во сообраќајот, како и неукажување помош на лице повредено во сообраќајна незгода.
Како што информираат од ЈО, осомничениот на 20 јануари, како учесник во сообраќајот на јавните патишта, управувал со „цитроен Ц4“ по булеварот „Партизански одреди“. На крстосницата со улиците „Московска“ и „Љубљанска“, каде светлосните сообраќајни знаци – семафори биле исклучени и работеле со трепкаво жолто светло, тој, приоѓајќи кон обележан пешачки премин, со брзина поголема од 50 километри на час, со предниот дел од возилото удрил во двајца пешаци кои поминувале по обележаниот пешачки премин. Девојката притоа се здобила со тешки телесни повреди и починала на самото место, додека другиот пешак бил повреден и пренесен во болница, соопштија од Јавното обвинителство.
Оттаму потенцираат дека осомничениот возач ги оставил без помош повредените лица и останал во своето возило до доаѓањето на увидната екипа.
Од Обвинителството претходно соопштија дека е издадена е и наредба за обезбедување на снимките од видеонадзорот на местото каде што се случи несреќата и за анализа на примероци од крв и урина на возачот.