Според обвинителството за него постои основано сомнение дека сторило кривични дела – Тешки дела против безбедноста на луѓето и имотот во сообраќајот, како и Неукажување помош на лице повредено во сообраќајна незгода
Основното јавно обвинителство во Скопје отвори истрага против 22 годишното момле кое вчера усмрти 24 годишна девјка на пешачки премин кај „Сити Мол“.
Според обвинителството за него постои основано сомнение дека сторило кривични дела – Тешки дела против безбедноста на луѓето и имотот во сообраќајот, како и Неукажување помош на лице повредено во сообраќајна незгода.
Како што информираат од ЈО, осомничениот на 20 јануари, како учесник во сообраќајот на јавните патишта, управувал со „цитроен Ц4“ по булеварот „Партизански одреди“. На крстосницата со улиците „Московска“ и „Љубљанска“, каде светлосните сообраќајни знаци – семафори биле исклучени и работеле со трепкаво жолто светло, тој, приоѓајќи кон обележан пешачки премин, со брзина поголема од 50 километри на час, со предниот дел од возилото удрил во двајца пешаци кои поминувале по обележаниот пешачки премин. Девојката притоа се здобила со тешки телесни повреди и починала на самото место, додека другиот пешак бил повреден и пренесен во болница, соопштија од Јавното обвинителство.
Оттаму потенцираат дека осомничениот возач ги оставил без помош повредените лица и останал во своето возило до доаѓањето на увидната екипа.
Бидејќи постојат околности кои укажуваат на опасност од бегство, можност осомничениот да влијае врз сведоците или вештаците и со тоа да ја попречува кривичната постапка, како и оправдан страв дека би можел да го повтори кривичното дело, надлежниот јавен обвинител до судијата на претходна постапка од Основниот кривичен суд Скопје доставил предлог за определување мерка притвор.
Од Обвинителството претходно соопштија дека е издадена е и наредба за обезбедување на снимките од видеонадзорот на местото каде што се случи несреќата и за анализа на примероци од крв и урина на возачот.