Ваквата одлука, како што се наведува во соопштението на Претседателството на Србија, е донесена поради бруталната употреба на сила од страна на косовскиот премиер Албин Курти против српскиот народ во Косово. Одлучено е и началникот на Генералштабот на српската армија, генерал Милан Мојсиловиќ, да одржува директен контакт со командантот на КФОР, во обид да се осигури дека КФОР/НАТО ги исполнува својата функција и мандат, во согласност со релевантните акти на ОН, и ги штити Србите во Косово
Вооружените сили на Република Србија засега остануваат на највисоко ниво на борбена готовност. Ова е одлуката која е донесена на денешната седница на Советот за национална безбедност на оваа земја, која вчера ја свика српскиот претседател Александар Вучиќ по тензиите меѓу косовската полиција и граѓаните на северот на Косово.
Ваквата одлука, како што се наведува во соопштението на Претседателството на Србија, е донесена поради бруталната употреба на сила од страна на косовскиот премиер Албин Курти против српскиот народ во Косово.
На седницата на Советот за безбедност биле договорени сите неопходни безбедносни активности со цел зајакнување на одбранбените капацитети на Србија, а било истакнато дека мисијата на НАТО во Косово (КФОР) не ја извршила својата работа согласно Резолуцијата 1244 на Советот за безбедност на Обединетите нации (ОН) и Воено-техничкиот договор од Куманово.
„Началникот на Генералштабот на српската армија, генерал Милан Мојсиловиќ, е овластен да одржува директен контакт со командантот на КФОР, во обид да се осигура дека КФОР/НАТО ги исполнува својата функција и мандат, во согласност со релевантните акти на ОН, и ги штити Србите во Косово“,
се вели во соопштението на Советот за национална безбедност на Србија, цитирано од тамошните медиуми.
Во соопштението било нагласено оти Србија ќе биде силна и непоколеблива во заштитата на својот народ.
Седницата на која се сретнаа сите претставници на безбедносните институции во Србија се одржа еден ден по конфликтот меѓу косовската полиција и локалното население на северот на Косово.
Тензиите во општините со мнозинско српско население во Косово (Звечан, Зубин Поток и Лепосавиќ) се случија откако новоизбраните градоначалници, на изборите што ги бојкотираа Србите, вчера ги презедоа функциите и влегоа во општинските згради. Во судир на косовската полиција со Србите беа повредени десетина лица.
По инцидентите, претседателот на Србија, Александар Вучиќ, нареди борбена готовност и распоредување на српската војска на границата со Косово.
Постапките на косовските власти во општините на северот ги осуди американскиот државен секретар Ентони Блинкен, кој го повика косовскиот премиер Албин Курти веднаш да престане со „насилните мерки и повторно да се фокусира на дијалогот што го води ЕУ“.
Осуда стигна и од Европската Унија, која најави дека веќе нема да прифаќа провокативни потези.
- Блинкен со остра реакција за случувањата на северот на Косово: Курти да го смени курсот, ова ќе има последици
- И ЕУ со осуда за тензиите на северот на Косово: Нема да прифатиме дополнителни провокации
По вчерашните тензии, од утринава на северот на Косово е мирно, а косовската полиција, која вчера со возила го блокираше пристапот до зградите на општините Звечан, Зубин Поток и Лепосавиќ, сè уште е во општинските објекти и ги блокира пристапот до нив.