Директорката на градинката е задолжена да започне постапка со која ќе се утврди фактичката состојба или евентуалната вина на вработените во установата за згрижување на детето, информираат од Министерството за труд и социјална политика
По наводите за 11-месечното бебе, чии родители тврдат дека се повредило поради невнимание на две негувателки во градинката „8 Април“ во скопско Шуто Оризари, денеска во градинката е извршен вонреден инспекциски надзор, информираат од Министерството за труд и социјална политика (МТСП).
До Министерството, како што додаваат оттаму, не е стигната официјална претставка за конкретниот случај, а вонредниот инспекциски надзор се врши по службена должност и по допрен глас во медиумите.
„Земени се изјави од вработените и согласно Законот за заштита на деца, инспекторите ќе издадат решение за постапување и утврдување на фактичката состојба или евентуална вина на вработените за згрижување за детето. Директорката на градинката е задолжена да започне постапка со која ќе се утврди фактичката состојба или евентуалната вина на вработените во установата за згрижување на детето“,
посочуваат од Министерството.
Родителите на 11-месечното бебе во изјава за медиумите тврдеа дека нивното дете било тешко повредено во градинката „8 Април“ во скопската општина Шуто Оризари. Според нивната изјава, детето е повредено во пределот на телото, а има и скршеница на клучната коска. За повредите, тие изразија сомнеж во неажурноста и невниманието на две вработени негувателки кои воедно не го информирале навремено семејството.