Заменик-министерката за транспорт, Зеколи-Шаќири, на состанокот истакнала дека изградбата на прекуграничниот железнички тунел претставува стратешки проект од регионално значење. Двете страни ја потврдиле својата посветеност за интензивирање на меѓусебната соработка и координација во сите фази од реализацијата на проектот
Министерството за транспорт информираше дека денеска во Софија се одржал првиот состанок на работната група на Македонија и Бугарија посветен на подготовките за изградба на заедничкиот прекуграничен железнички тунел на Коридор 8.
Како што соопшти Министерството, со состанокот на работна група претседавале заменик-министерките за транспорт на Македонија и Бугарија – Калтрина Зеколи-Шаќири и Цвета Тимева.
„Во состав, покрај заменик-министерката Калтрина Зеколи Шаќири како копретседавач, учествуваат и претставници од Министерството за транспорт, Министерството за надворешни работи, од Министерството за внатрешни работи, од Министерството за одбрана, од Министерството за животна средина и просторно планирање, претставници од Јавното претпријатие за железничка инфраструктура, како и од Железници Транспорт АД-Скопје“,
соопштија од Транспорт.
Заменик-министерката за транспорт Зеколи-Шаќири на состанокот истакнала дека изградбата на прекуграничниот железнички тунел претставува стратешки проект од регионално значење.
Двете страни ја потврдиле својата посветеност за интензивирање на меѓусебната соработка и координација во сите фази од реализацијата на проектот.
„На средбата беше постигната согласност за воспоставување јасна динамика на активностите, дефинирање на конкретни обврски на надлежните институции од двете земји, како и за продолжување на заедничките технички подготовки за изградба на прекуграничниот железнички тунел. Членовите на работната група ги утврдија следните чекори во насока на обезбедување на финансиска поддршка и техничката координација, при што беше потврдена заедничката определба за забрзување на реализација на овој стратешки инфраструктурен проект“,
велат од Министерството за транспорт.
Договорено е следниот состанок на заедничката работна група да се одржи во Скопје. На тој состанок треба да биде направен преглед на реализацијата на договорените активности и да се утврдат следните чекори.