Докторот Кунгуловски од оваа Лабораторија на социјалните мрежи сподели дека се чекаат резултатите за уште четворица
Од МЗ попладнево соопштија дека и оние четири претходно заразени лица со делта-сојот не биле вакцинирани
Уште два случаи на делта-сојот на коронавирусот вчера биле потврдени во лабораторијата на приватната клиника „Жан Митрев“ од каде преку соопштение предупредуваат дека се шири новата варијанта на ковид-19.
„Уште од самиот почеток на пандемијата, во лабораторијата редовно се врши секвенционирање на позитивните примероци со цел детекција на нови соеви во државата. Сите позитивни примероци за кои внимателно се утврдува дека се сомнителни за некој друг сој на вирусот, различен од доминантниот, подлежат на понатамошно секвенционирање и утврдување на конкретниот сој. Во овој случај беше детерминирано дека се работи за делта сојот, уште познат и како индиски сој“,
велат од „Жан Митрев“.
Од Клиниката не споделуваат детали за пациентите, но докторот Горан Кунгуловски од оваа Лабораторија на социјалните мрежи сподели дека станува збор за невакцинирани пациенти, како и дека се чекаат резултатите за уште четворица.
Покрај овие два случаи, претходно во текот на денот, министерот за здравство, Венко Филипче, објави дека во земјава е регистриран уште еден случај кај пациент од Велес, со што бројот на потврдени случаи сега е четири и оти се чекаат резултатите за други четворица сомнителни.
„Тие се лекуваат во Скопје, само еден е со потешка форма и е на респираторна машина, другите се со стабилна клиничка слика. Скринингот што се прави на тестовите на Институтот за јавно здравје и во МАНУ ја исклучува британската варијанта. Што значи дека секаде каде што скринингот ќе покаже дека не е британската варијанта, се прави испитување дали е индискиот сој“,
рече Филипче.
Од Министерството за здравство предмалку во соопштение потеницираа дека сите заразени не биле вакцинирани.
„Ниту еден од ковид позитивните пациенти кај кои е изолиран делта сојот на SarsCov2 не е вакциниран за Ковид 19. По направените анкети со пациентите утврдено е дека никој од нив не примил ниту една доза вакцина, односно ниту се вакцинирани, ниту ревакцинирани. Од вкупниот број позитивни пациенти, кај кои е утврдено присуство на делта сој, само еден е во многу тешка состојба. Станува збор за пациент, кој 8-9 дена откако појавил симптоми на Ковид 19, одбивал да оди на лекар и бил во домашна изолација. Во моментов се вршат епидемиолошки анкети на останати членови од семејството на двајца од хоспитализираните пациенти, кои живееле во заедница и возможно е да се утврди и кај нив присуство на индијски сој на вирусот“,
велат од МЗ.
Првиот случај на индиската мутација во земјава беше регистриран пред еден месец кај патник од Ирак, кој десетина дена бил хоспитализиран во болница. Потоа имаше уште два случаи кај пациенти кои претходно патувале во Виена.