По денешните разговори со Гаши, Заев најави дека ќе свика седница на Централниот одбор и дека ќе ја поднесе оставката што ја најави на чело на партијата, по што би почнала процедурата за избор на негов наследник
Лидерот на СДСМ Зоран Заев, кој ја извршува оваа функција од 2013 година, во три мандати, најави дека за вторник ќе закаже седница на Извршниот и на Централниот одбор, каде што, како што најави, ќе ја поднесе оставката на партиската функција.
Иако најави дека ќе се избира и нова Влада, со нов мандатар, Заев не потврди дека негов наследник ќе биде Димитар Ковачевски, кој го придружуваше на денешната средба со лидерот на Алтернатива, Африм Гаши. На барање на новинарите да му постават прашања на Ковачевски, Заев рече дека денеска само тој ќе дава изјава.
На прашање што ќе прави Алтернатива доколку реши да влезе во Владата, додека да завршат процедурите во СДСМ за избор на нов лидер кој би бил мандатар, Гаши рече дека Алтернатива не сака да се меша во внатрешните работи на СДСМ како партија.
Од вторник, за кога Заев најави состанок на органите на СДСМ на „Бихаќска“, ќе почне да тече рокот од 15 дена, во кои, според партискиот статут, треба да бидат распишани внатрепартиски избори за лидер, кога треба да се одреди и датумот за нивно одржување.
Како што вчера објави „360 степени“, високи партиски извори најавуваат дека, со оглед на временскиот теснец што се создаде, затоа што ќе треба да се избира и нова Влада, не е исклучено да се скратеи рокот за распишување на внатрепартиските избори и гласањето на членството да се реализира во многу скоро време.
„Ако се следи Уставот, до 14 декември нема да заврши изборот на нова влада и нов мандатар. Логично е СДСМ да го искористи овој период и да го избере својот претседател. Затоа ќе побарам да биде свикан Централниот и Извршниот одбор за да се констатира мојата оставка и веднаш да почне постапката за избор на нов претседател на партијата. Зборот е збор и ќе се радувам да дочекам ваква големина и даден збор од други политичари. Ако се успее во целиот овој период, а верувам дека може, СДСМ да има избрано претседател, тој би требало да биде идниот мандатар односно да предложи нова Влада. Кога имате нов мандатар, треба да имате и нова Влада, а не реконструкција на Влада“,
нагласи Заев.
Рече дека претстои процес на избор од страна на членството на СДСМ и оти партијата преку непосредни избори ќе одлучи кој ќе биде идниот лидер.
За денешното присуство на Ковачевски на состанокот со Алтернатива, Заев рече дека тој е член на Извршниот одбор на СДСМ и претседател на партиската Комисија за финансирање и буџет, како и докажан кадар кој комплетно е подготвен да помогне во денешните разговори.