Возилото било пренатрупано со 30 патници, двојно повеќе од дозволеното, за кои се претпоставува дека се илегални мигранти
Најмалку десет лица загинаа, а дваесетина се повредени во сообраќајка со комбе кое се превртело од патот во Јужен Тексас.
Возилото било пренатрупано со 30 патници, двојно повеќе од дозволеното, за кои се претпоставува дека се илегални мигранти, како што јави државната полиција.
Несреќата се случила вчера, околу 16 часот по локално време, на автопатот 281 кај Енцино, околу 30 милји северно од Мекален, во Јужен Тексас, каде што комбето удрило во метален столб и знак „стоп“, по што се превртело.
„Возачот и девет патници загинаа, додека другите 20 патници се пренесени во локалните болници, каде што е утврдено дека некои се во критична состојба“,
изјави шефот за јавна безбедност на Тексас, Натан Брендли.
Несреќата се случила неколку милји од контролниот пункт на Граничната полиција на САД, но Брендли вели дека сведоците на несреќата не виделе дека ево тек потера по комбето.
Преживеаните, рече тој, се здобија со сериозни повреди, а патниците се чини дека се мигранти.
Според медиумите, во комбето имало 29 илегални мигранти, без документи. Според сведоците, возачот на комбето „Форд“ се обидел да сврти со голема брзина пред да удри во метален столб.
Додека околностите за несреќата се уште се испитуваат, властите работат со мексиканскиот конзулат за да ги идентификуваат жртвите.
