Директорот на болницата, Христијан Костов, вели дека последиците од невремето се санираат, а во меѓувреме се работи во две други операциони сали
Две хируршки сали во Градската општа болница „8 Септември“ се поплавиле по синоќешното невреме во Скопје кое беше проследено со обилни врнежи од дожд и силен ветер. Директорот на болницата, Христијан Костов, во изјава за МИА вели дека последиците од невремето се санираат, а во меѓувреме се работи во две други операциони сали на приземјето на болницата.
„Има мајстори кои работат на лице место, се санираат последиците од невремето, проблемот ќе биде надминат за најбрзо можно време, ама пациентите не трпат, се работи во други две сали. Пациентите не треба да се грижат, нема никаков застој во медицинската грижа и заштита“,
вели Костов во изјава за МИА.
До поплавување на операционите сали дошло откако покривните одводи не успеале да ја соберат целата надојдена атмосферска вода и дошло до протекување меѓу двете операциони сали.