Во последен момент доставени се кандидатските листи на парламентарните партии. Од ВМРО-ДПМНЕ листите со имиња на кандидати за пратеници ги поднесоа околу 22 часот, а СДСМ во коалиција со Беса тоа го сторија на еден час пред полноќ, односно пред истекот на рокот.
Во текот на денот кандидатски листи до Државната изборна комисија поднесоа и помали и вонпарламентарни партии.
„Со ова практично го завршуваме овој дел од да кажеме пред кампањата, а нè очекуваат неколку дена каде што ќе ги поминеме пред сè во однос на барање на алтернативни начини како да останеме во непосреден контакт со граѓаните. Притоа, секако, почитувајќи ги препораките и мерките пред се на Светската Здравствена Организација со оглед на моменталната ситуација во однос на корона вирусот“,
изјави вечерва генералниот секретар на ВМРО-ДПМНЕ, Игор Јанушев по поднесувањето на кандидатски листи до Државната изборна комисија.
На прашањето кампањата ќе се води преку социјалните и електронските медиуми или преку собири со граѓани, Јанушев одговори дека бараат начин, но на прво место им е здравјето и животот на граѓаните.
„Досегашните мерки и забрани кои што ги имаме во однос на собирите до 24 март, тоа е всушност и вториот дел, официјалниот дел на кампањата. Ќе гледаме како ќе се одвива целата ситуација во поглед на тоа ќе одлучиме како понатаму. Во следните неколку дена ќе соопштиме и конкретно што планираме да направиме и секако уште еднаш ќе потенцирам дека целокупните капацитети на партијата, целокупните капацитети на луѓето во партијата ги ставаме на располагање со се што можеме да помогнеме за полесно да се справиме со ова што се случува во државата“,
рече Јанушев.
Кандидатските листи на коалицијата „Можеме“ предводена од СДСМ и од Беса вечерва ги доставија Дамјан Манчевски од СДСМ и Аријанит Хоџа од Беса. Тие истакнаа дека очекуваат оваа најмногубројната и најразноликата коалиција да победи на претстојните избори.
„На оваа листа се 120 имиња одговорни граѓани, кои ја сакаат својата земја и кои се спремни да направат се за своите граѓани, да се вложат себеси со професионална работа во независен парламент. Ова е најгоелмата коалиција во моментот составена од различни политички партии кои се обединети околу она што е важно за граѓаните, иднината за државата, како што се, пред се, членството во НАТО и ЕУ, економскиот раст, поголеми плати и пензии, грижа за сите, правда и праведна држава и здрава животна средина“,
истакна Манчевски.
Токму тоа се и клучните столбови околу кои се обединиле различни политички партии зад кои, како што истакна Манчевски, застанаа сите етнички заедници во коалицијата „Можеме“ и кои носат уште побрз напредок на земјата.
„Сите политички субјекти од оваа најголема и победничка коалиција ја препознаа важноста и потребата на граѓаните, а тоа е државата да продолжи по вистинскиот пат затоа што сега кога државата е на викстинскиот пат, кога станува член на НАТО и кога следува почеток на преговорите со ЕУ многу е кважно да продолжиме да чекориме уште посилно по тој пат. Важно е да продолжат реформите, да растат платите и пензиите, да расте економијата, инвестициите, да продолжи развојот на инфраструктурата, вложувањата во образованието, во социјалата, во здравството. Докажавме, а во новиот мандат ќе покажеме дека можеме уште повеќе и уште подобро“,
рече Манчевски.
Генералниот секретар на Беса, Хоџа, истакна дека нивната коалиција ќе биде победник на овие избори и дека ќе владее со државата.
„Ние очекуваме дека различностите и придобивките што ги нудиме во општеството ќе се сфатат најпозитивно и така победнички ќе владееме“,
рече Хоџа.
Манчевски, одговарајќи на новинарсо прашање за тоа како ќе се води кампањата имајќи ги предвид мерките за спречување со корона вирусот, рече дека за нив здравјето на граѓаните е најважно, така што ќе тие се прилагодат на условите и на она што во тој момент ќе бидат условите во коишто ќе се води кампањата.
„Прерано е да се каже уште од сега што ќе се случува тогаш. Ги следиме упатствата, насоките, препораките од страна на Владата и на државните институции, така што каква и да е состојбата ние ќе се прилагодиме на неа. Приоритет е здравјето на граѓаните и каква кампања да се води, пред се, во преден план ќе биде сигурноста, здравјето и безбедноста на граѓаните, а ние ќе најдеме алтернативни начини како нашите пораки да стасаат до нашите сограѓани“,
рече Манчевски.