Пратениците на СДСМ се во собранието, но главно се надвор од пленарната сала, затоа што, како што велат, не сакаат да и даваат легитимитет на „јаловата расправа“ на опозицијата.
Мал број на пратеници денеска се појавија на седницата на која на дневен ред се ставени законот за јавно обвинителство и предлог-законот за Советот на јавни обвинители. Пратениците на СДСМ се во собранието, но главно се надвор од пленарната сала, затоа што, како што велат, не сакаат да ѝ даваат легитимитет на „јаловата расправа“ на опозицијата.
Собранискиот спикер Талат Џафери ја прескокна првата точка, бидејќи се уште нема мнозинство за да може да се гласа за законот за јавно обвинителство. Па со еден час задоцнување, седницата започна со расправа за законските измени за Советот на јавни обвинители.
Пратениците се препукуваат кој имал повеќе образ да зборува за правда во државата и чии криминали се поголеми.
Прв зеде збор пратеникот на ВМРО-ДПМНЕ Антонио Милошоски кој го обвини лидерот на СДСМ, Зоран Заев дека од обвинителите сакал да направи свои адвокати, за како што рече, да ги спаси од одговорност неговите функционери вмешани во криминал.
Пратениците од СДСМ пак, се навратија на телефонските разговори од нелегалното прислушување за местење на судски процеси, па порачаа дека ВМРО-ДПМНЕ нема право да говори за правна држава.
Измените во законот за јавно обвинителство и законот за Советот на јавни обвинители треба да се носат по скратена постапка. За законот за јавно обвинителство потребно е двотретинско мнозинство, а гласањето е одложено за утре, пред распуштањето на парламентот.