Централното чествување е утре на Мечкин камен од 12:30 часот, каде што ќе се обрати премиерот Христијан Мицкоски
Низа свечености денеска во Крушево ќе го одбележат почетокот на чествувањето на 121 година од Илинденското востание и Крушевската Република.
Денеска од 10 часот делегации ќе ги посетат спомен-куќата на Смилевскиот конгрес и споменикот на Дамјан Груев, каде што ќе се поклонат и ќе положат свежи цвеќиња.
Во 18:45 часот во центарот на Крушево, пред црквата „Свети Никола“ ќе бидат пречекани коњаниците од цела Македонија. Традиционално, крушевчани ќе ги пречекаат поддржувачите на традициите од Илинденските денови со леб и сол.
Во пресрет на отворањето на националната манифестација „10 дена Крушевска Република“ од 20 часот на Гумење, почит пред нивните споменици и спомен-обележја ќе им биде оддадена на: Веле Марков, на Питу Гули, на Тоше Проески, на нивните вечни почивалишта на Гумење, на загинатите борци пред споменикот на Партизанските гробишта, на борците од Илинден 1903, во криптата во споменичниот комплекс Илинден.
На свеченото отворање на манифестацијата „10 дена Крушевска Република“, од 20 часот на Гумење, ќе се прочита Крушевскиот манифест и ќе се подигне бајракот на Крушевската Република. На отворањето се очекува да се обратат Томе Христоски, градоначалник на Крушево и претседател на манифестацијата, како и министерот за култура Зоран Љутков.
Манифестацијата ќе биде проследена со богат огномет, културно-уметничка програма и импровизиран напад на Крушево, како потсетување на славните илинденски денови и на Првата република на Балканот.
Централните чествувања на 121 година од Илинденското востание и Крушевската Република се на 2 август. Почит ќе им биде оддадена на претседателот на Крушевската Република, Никола Карев, на неговото вечно почивалиште во Македониумот, на загинатите борци кај месноста Слива, а во нивни спомен ќе се одржи и панихида во крушевската црква „Свети Никола“.
Централното честување е на Мечкин камен од 12:30 часот, каде што ќе се обрати премиерот Христијан Мицкоски.
Претседателката Гордана Сиљановска-Давкова годинава 2 август, Денот на републиката, ќе го одбележи во Меморијалниот центар на АСНОМ во Пелинце, каде што ќе одржи говор, а потоа, заедно со нејзиниот српски колега Александар Вучиќ ќе го посетат манастирот „Свети Прохор Пчински“.
Претседателот на Собранието, Африм Гаши, ќе биде во Скопје, односно ќе присуствува на пригодната манифестација на тврдината Кале, каде што ќе одржи говор.