Возилото се движело со голема брзина, а возачот изгубил контрола додека се обидувал да излезе од автопатот, удрил во наплатната рампа, а потоа во блискиот контејнер, соопшти полицијата
Грчките власти денеска соопштија дека седум мигранти загинаа, а осум се повредени откако возачот на возилото со кое патувале изгубил контрола и удрил во патарина на автопат во северна Грција.
Грчката полиција соопшти дека возилото со 15 лица се движело по автопат во североисточниот дел на земјата, во правец од Турција кон Солун, кога нешто по полноќ се случила несреќата, пренесува агенцијата АП.
Возилото се движело со голема брзина, а возачот изгубил контрола додека се обидувал да излезе од автопатот, удрил во наплатната рампа, а потоа во блискиот контејнер, соопшти полицијата.
Повредени се четворица мажи од Пакистан, еден од Авганистан и двајца од Непал, како и 35-годишниот возач од Молдавија.
Тие се пренесени во болниците во градовите Ксанти и Комотини, во североисточна Грција.
Една жена е меѓу седумте загинати во несреќата, а националноста на загинатите сѐ уште не е позната, соопштија властите.