Грчките власти ја изрекоа првата казна за фирма поради профитерство во време на епидемија. Се работи за компанија за антисептици која ќе треба да плати казна од 50 илјади евра.
Министерот за развој и инвестиции на Грција, Адонис Георгиадис, во интервју за грчката телевизија Мега, утрово рече дека досега се направени над 400 контроли, пренесе МИА.
„Онаму каде што откривавме проблеми, казнувавме. Вчера ѝ ја изрековме првата казна од 50 илјади евра на компанија за антисептици која сметаше дека е добро за време на криза да си ја зголеми стапката на профит за 10 процентни. Ова е целосно неприфатливо. Сите треба да сфатиме дека не е време за лесен профит“,
рече Георгиадис.
Во рамки на контролите за почитување на забраната за движење, грчката полиција од понеделникот до вчера со 150 евра казнила 4 063 граѓани.
Во текот на вчерашниот ден, при контролите на грчката полиција, биле казнети 1 113 лица за непотребно движење и прекршување на забраната, а најголемиот дел, 344 прекршувања, се во Атика, поширокиот дел на Атина.
Од понеделникот, кога и стапи во сила забраната за движење, заклучно со вчера биле изречени 4 063 казни.