Уште четири лица во Грција ја загубија битката за живот како последица на коронавирусот, јавува дописничката на МИА од Атина.
Во Грција регистрирани се 95 нови случаи, со што бројот на жртвите се зголеми на 32, а бројот на заразени лица на 1061.
На одделите за интензивна нега во грчките болници, хоспитализирани се 69 лица, кои се приклучени на апарати, а нивната просечна возраст е 66 години, соопшти претставникот за Ковид-19 од Министерството за здравство на Грција, професорот епидемиолог Сотирис Циодрас.
Во Грција, до сега, анализирани се 14 363 примероци.
Бројот на починати во Грција денеска се зголеми на 32 лица, од кои 25 се мажи, а седум жени на просечна возраст од 73 години.
Заменик-министерот за цивилна заштита на Грција Никос Хардаљас, соопшти дека од денеска, 29 март до 15 април 2020 година, се прекинуваат сите летови од и кон Холандија, како и трансфер летовите од и кон Германија, односно оние кои ја немаат Атина како конечна дестинација.
Хардаљас детално се осврна на враќањето на грчки граѓани од странство, истакнувајќи дека се врши само во случаи кога постои сериозна причина, а не станува збор за општа репатријација, на сите, бидејќи „тоа би било катастрофално“.
Тој посебно се задржа на Англија, објаснувајќи дека оттаму постојат 2.850 барања за враќање во Грција.
Објасни дека ќе се вратат само оние кои имаат сериозна потреба и припаѓаат на три посебни категории: оние кои имаат потреба од итна здравствена грижа што не може да им се пружи онаму каде што се наоѓаат (бремени жени, лица со сериозни здравствени проблеми); оние кои немаат каде да престојуваат поради завршувањето или прекинувањето на работниот договор, како и оние кои што се заглавени поради транзит летови.