Изборите започнаа на 6 јуни во Холандија, Словачка, Летонија, Чешка, Малта и Ирска, а денеска на последниот ден од изборите се гласа во дваесет земји членки на Унијата
Во соседството, во Грција граѓаните имаат можност да гласаат за некои од 1 168 пријавени кандидати за европратеници од 31 партија. Земјата во Европскиот парламент добива 21 пратеничко место, а право на глас имаат нешто помалку од десет милиони жители. Граѓаните на Грција имаат можност да одберат најмногу четворица кандидати од една партија, а овие избори се особено важни за земјата, бидејќи по првпат е воведена опцијата за поштенско гласање за сите Грци што живеат во странство и за оние што живеат во земјата.
Првите официјални резултати од Министерството за внатрешни работи на Грција, кое е и надлежно за пребројувањето на гласовите, се очекува да бидат соопштени околу 21 часот по локално време, кога ќе се знае и колку партии го поминале изборниот праг од три отсто и обезбедиле место во Европскиот парламент.
Во Хрватска, пак, денеска се гласа по четврти пат на европските избори. Право на глас имаат околу 3,7 милиони гласачи кои ќе одберат 12 пратеници што ќе ја претставуваат државата во Европскиот парламент во следните пет години. На овие избори има 25 листи со имиња на 300 кандидати.
Најголем број европратеници или 96 се избираат во Германија, по што следува Франција со 81, Италија со 76, Шпанија со 61, Полска со 53, Романија со 33, Холандија со 31, Белгија со 22, Грција, Португалија, Унгарија, Чешка и Шведска со по 21, Австрија со 20, Бугарија со 17, Данска, Словачка и Финска со по 15, Ирска со 14, Хрватска со 12, Литванија со 11, Летонија и Словенија со по девет, Естонија со седум и Кипар, Луксембург и Малта со по шест членови во Европскиот парламент.
Според последните анкети на јавното мислење и излезните анкети од земјите каде што гласањето заврши, се очекува десно центристичката Европска народна партија (ЕПП), да освои меѓу 173 и 181 мандати, пред лево центристичката Прогресивна алијанса на социјалистите и демократите (СД) со од 138 до 143 места и либералниот блок „Да ја обновиме Европа“ на кој му се предвидува да освои меѓу 75 и 85 европратеници. Рамо до рамо со либералите е националистичката и десничарска групација Европски конзервативци и реформисти (ЕРЦ), која се очекува да освои од 76 до 82 мандати, пред екстремно десничарската група Идентитет и демократија (ИД) со меѓу 67 и 69 пратеници, блокот на Зелените и Европска слободна алијанса (ЕФА) кој би требало да освои меѓу 41 и 58 европратеници и Левицата со од 32 до 42 места.