Во соопштението на Интерпол за акцијата може да се прочита и дека биле откриени и лажни медицински производи, меѓу кои и средства за дезинфекција и 17 000 лажни тестови за ковид-19
Македонските органи во рамки на меѓународна акција на Интерпол спречиле увоз на 63 тони пилешко место од Полска и со тоа било спречено во земјава да се внесе вирусот на високо патогена инфлуенца во земјава.
Од Агенцијата за храна и ветеринарство (АХВ) за државната агенција МИА ги потврдија информациите и велат дека станува збор за три пратки механички обескостено пилешко месо кое требало да се „протне“ преку граничниот премин „Табановце“. Трите пратки се уништени на депонијата „Дрисла“.
„Инспекциските служби на АХВ беа дел од големата акција ’ОПСОН 9‘ на Интерпол и Европол, во која Република Северна Македонија учествуваше заедно со уште 82 држави. Акцијата се реализираше од декември 2019 до јуни 2020 година, а акцент беше ставен на трговијата со фалсификувана и неквалитетна храна и пијалаци. Во рамки на законски дефинираните надлежности, официјалните ветеринари на граничен премин, во насока на заштита од внесување на вирусот на високо патогена инфлуенца во Република Северна Македонија, спречија увоз на три пратки со по 21 тон механички обескостено пилешко месо кои потекнуваат од региони во Полска кои поради оваа болест се забранети за увоз“,
велат од АХВ.
Исто така, во рамки на оваа седуммесечна акција, во март инспекторите од АХВ утврдиле и недоследност кај еден оператор со храна кој увезол над 20 тони преработки од месо по потекло од Холандија. Кај него со лабораториските испитувања е утврдено дека постојат неусогласености кај декларираниот производ. Од вкупно увезената количина на овие месни преработки, околу 17 тони се вратени на извозникот од Холандија, а повеќе од 1,7 тони преработки од месо увезени се уништени.
За оваа акција, на 22 јули соопштение објави и Интерпол. Во него се наведува дека биле сузбиени 19 групи на организиран криминал и биле уапсени 407 лица во светот. Покрај месни производи, како што е случајот со нашата земја, во акцијата на глобално ниво се запленети и млечни производи, како и прехранбени производи кои лажно биле означени како лековити.
Бугарската Агенција за безбедност на храна, на пример, открила сирење кое на тестирањето се покажало дека има присуство на бактерии. Биле запленети и уништени 3,6 тони сирење. Во Јордан, пак, биле запленети околу 2 000 литри енергетски пијалак и 7 тони расипано млеко и сирење.
Во соопштението на Интерпол за акцијата може да се прочита и дека биле откриени и лажни медицински производи, меѓу кои и средства за дезинфекција и 17 000 лажни тестови за ковид-19.
Интерпол констатира дека во оваа акција се запленети значително повисоки количини на прехранбени производи со истечен рок при што констатира дека можеби криминалните мрежи профитирале во текот на пандемијата со вирусот бидејќи карантинот и затворањето на земјите го нарушиле синџирот за снабдување со храна.