Претседателот на Собранието Талат Џафери закажа седница на која на дневен ред се ставени новиот закон за јавно обвинителство и законот за Совет на јавни обвинители.
Седницата е закажана за 17 часот.
Измените во законот за Совет на јавни обвинители се поради новото решение според кое преку ова тело ќе оди изборот на шеф на Обвинителството за организиран криминал, за што претходно ќе има избори на кои ќе гласаат сите обвинители.
Претседателот на Комисијата за европски прашања Артан Груби денеска потсети дека законите за ЈО и за Совет на јавни обвинители треба да се донесат по скратена постапка.
„Прво на пленарна седница треба да помине потребата за скратена постапка за усвојување на овие закони, па после ќе дојде во прво и второ читање во Комисијата и ќе трае два работни дена при што после се проследува законот до пленарна седница каде што ќе треба претседателот Талат Џафери да го стави на усвојување и овој закон што се надевам дека консензуално ќе биде усвоен од сите пратенички групи во Собранието. Што се однесува до комисиската седница, јас сум убеден дека доколку сè е во ред ќе успееме да го завршиме целиот процес до среда за да може да се усвои законот во рамки на очекуваните денови и за да се распушти овој парламентарен состав за да се одржат изборите како што беше претходно консензуално договорено кај претседателот Пендаровски, на 12 април“,
објасни Груби.
За законот за јавно обвинителство е потребно двотретинско мнозинство или 80 гласа кои власта ги обезбеди со помош на независната група пратеници од ВМРО-ДПМНЕ, чии барања беа прифатени и вметнати во законското решение.
Груби очекува законот да добие поддршка и од ВМРО-ДПМНЕ.
Двете нови законски решенија стигнале во парламентот по полноќ, откако беа усвоени на синоќешната владина седница.