„Ќе воведеме мерит систем и избор по компетентност и способност. Со оваа мерка и укинување на управните одбори ќе заштедиме средства кои вистински ќе се пренасочат за потребите на здравствениот систем“, велат од оваа партија
Разрешувањето на медицинскиот директор на Клиниката за токсикологија е одраз на негативната селекција во здравството од страна на СДСМ и ДУИ, а воедно е и поддршка за самоволието на некомпетентни економски директори.
Ова е денешната реакција на ВМРО-ДПМНЕ на вчерашната одлука на министерот за здравство Илир Демири кој го разреши медицинскиот директор на ова клиника и најави дека доколку дојдат на власт ќе ја укинат функцијата економски директор во здравствените установи.
Министерот Демири за економската директорка Бесија Иљази рече дека нема констатирано ниту едно прекршување во нејзината работа.
Според ВМРО-ДПМНЕ, владеењето како досега, како што велат, е одраз на функционирањето на власта во заминување за која, додаваат, синоним се сомнителни набавки, непотизам и диуализам во здравството. Сето тоа, како што велат од оваа партија, е основа за самоволие и уцени наместо, како што посочија, да има професионализам и унапредување на здравствениот систем.
„Затоа прашуваме дали се точни информациите дека економската директорка Иљази за два месеци го зголемила долгот за два милиони денари? Дали воопшто доаѓа на работа економската директорка и со кои компетенции и работно искуство доаѓа на оваа позиција? Дали се точни информациите дека поради одбивање да потпише согласност за договор на дело за двајца дипломирани биолози, токсиколошката лабораторија веќе два месеци не врши валидација на издадените резултати?“,
се вели во соопштението од ВМРО-ДПМНЕ.
Оттаму велат дека се приближува крајот на ваквото незаконие, па затоа се обврзуваат, како што велат, дека ќе ја укинат функцијата организациски директор на клиниките.
„Ќе воведеме мерит систем и избор по компетентност и способност. Со оваа мерка и укинување на управните одбори ќе заштедиме средства кои вистински ќе се пренасочат за потребите на здравствениот систем“,
велат од ВМРО-ДПМНЕ.
Дел од лекарите од Клиниката за токсикологија вчера рекоа дека уште од првиот ден се соочуваат со отпор и несоработка со организациската директорка на Клиниката за токсикологија, која, според Нико Беќаровски, раководителот на Одделот за интензивна нега на Клиниката за токсикологија, инсистира да бидат вработени 18 лица на кои на крајот на минатата година им биле истечени договорите.
Според Беќаровски, клиниката реално нема потреба од толкав број на вработувања. Главниот проблем со кој се соочува Клиниката во моментов, посочи тој, е доекипирање на лабораторијата.
„Секој што малку разбира токсикологија знае дека токсиколошка клиника без токсиколошка лабораторија не може да функционира. Во моментот таму има еден лаборант, а за минимум да работи оваа лабораторија потребни се барем двајца дипломирани биолози и еден техничар со средно медицинска спрема“,
изјави вчера тој.
Инаку, по прес-конференцијата на лекарскиот колегиум, прес-конференција одржа и организациската директорка Бесија Иљази, но само на албански јазик. Дел од медиумите ја напуштиле оваа прес-конференција зашто им било соопштено дека нема да има превод.
Вработените на Клиниката за токсикологија завчера преку соопштение посочија дека од почетокот на нејзиното назначување за помалку од два месеца долгот на Клиниката се зголемил за приближно два милиони денари.
Во писмото испратено од вработените на оваа клиника се вели дека организациската директорка не ги исполнува условите за функцијата кои, како што додаваат, се пропишани со законот за директори.
Во нивната реакција пишува и дека таа на работа доаѓала во 10 часот, а си одела во 14 и 30 часот, односно, како што велат, на работа присуствувала по четири и пол часа.