Отфрлањето на кривичната пријава поднесена од ВМРО-ДПМНЕ за нерегуларности во текот на референдумското гласање во 2018 година е уште еден доказ дека правосудството е под контрола на власта, коментира портпаролот на опозицијата Димче Арсовски, откако Основното јавно обвинителство во Тетово ја отфрли пријавата за нерегуларности во гласањето во општините Желино и Боговиње.
На прес-конференција во партиското седиште, Арсовски посочи дека повеќе од јасно било дека не е возможно на едно гласачко место граѓани да гласаат за 2-3 секунди, а во отфрлањето на пријавата гледа обид на власта да го амнестира, како што рече, криминалот направен на денот на референдумското гласање.
„Ова е уште еден показател и доказ дека Зоран Заев управува со правосудните органи, ова е уште еден доказ дека наместо независно ние имаме ‘Луј Витон’ правосудство. Ова е уште една потврда и доказ зошто ние сме хибриден режим, зошто сме заробена држава, зошто Заев ги има канџите во правосудните органи и со тоа се амнестира уште еднаш за уште една криминална ситуација која ја има креирано на денот на референдумското гласање“,
порача Арсовски.
Во кривичната пријава ВМРО-ДПМНЕ обвинуваше повеќе лица и полициски службеници за злоупотреба на службена положба и овластување, несовесно работење во службата, злоупотреба на избирачко право, изборна измама, фалсификување или уништување деловни книги и повреда на тајноста на гласањето.
Основното јавно обвинителство во Тетово, пак, откако ги сослушало пријавените лица и ја прегледало целокупната документација од МВР и ДИК, информира дека записниците се уредни и дека не се констатирани неправилности во гласањето.
Нерегуларности не биле констатирани ниту од други лица што биле ангажирани за следење на изборите, како што се набљудувачите од МОСТ, а и полициските службеници што ги обезбедувале избирачките места истакнале дека на денот на изборите не забележале никакви неправилности.
Поврзани вести:
ОЈО за кривичната од ВМРО-ДПМНЕ: Немало нерегуларности во Желино и Боговиње за референдумот во 2018