ВМРО-ДПМНЕ утре ќе поднесе кривични за вчерашното гласање на двајцата пратеници со ковид

Тоа што е ноторно е дека вчера се прекршија членовите 205 и 206 од Кривичниот законик. Бидејќи никој не е над законите, вклучително и Претседателот на Собранието и пратениците, одговорност мора да има, изјави денеска Мицевски

ВМРО-ДПМНЕ преку координаторот на пратеничката група Никола Мицевски најави дека ќе поднесе кривични пријави затоа што двајца пратеници, иако позитивни на коронавирус, вчера дојдоа во скафандери во Собранието за да обезбедат кворум за 32-та седница.

Кои се пратениците што облекоа скафандери за да гласаат во Собранието

„Присуството на двајца позитивни пратеници, спротивно на сите законски норми по никоја цена не беше оправдано, а секој обид за нивно воздигнување во т.н. статус на херој е срамен и безобразен чин во очите на вистинските херои на оваа пандемија“,

рече Мицевски на прес-конференцијата во Собранието.

Тој ги повтори ставовите на неговата партија дека вчера се случил театар за задоволување на личните желби на поединци, за да се одржи 32. Седница, иако како што рече тие цела недела најавуваа дека ќе дадат поддршка на петтиот сет економски мерки.

„Тоа што е ноторно е дека вчера се прекршија членовите 205 и 206 од Кривичниот законик. Бидејќи никој не е над законите, вклучително и Претседателот на Собранието и пратениците, одговорност мора да има. Затоа, во текот на утрешниот ден пратеничката група на ВМРО-ДПМНЕ ќе поднесе кривична пријава до Основното јавно обвинителство. На потег ќе биде правосудството кое ќе треба да се оттргне од очигледните политички стеги во рамките на коишто функционира според сите меѓународни извештаи“,

рече Мицевски.

Двајцата пратеници во скафандери гласаа според протокол донесен уште во јули, дополнет во ноември

Претседателот на Собранието, Талат Џафери појасни денеска дека доаѓањето на пратениците со скафандери е во согласност со протоколот за работа на Собранието во услови на ковид-19, кој бил донесен пред конститутивната седница на овој пратенички состав, а дополнет во ноември минатата година. Спикерот рече дека тој побарал од Комисијата за заразни болести да се ревидира протоколот откако опозицијата со околу три илјади амандмани го блокираше неговиот предлог за измени на собранискиот Деловник, со кои беше предвидено онлајн-вклучување на седниците на пратеници што се во изолација.

„Измените овозможуваат пратеници што се изолирани, а се асимптоматски и не се згрижени во здравствени установи да може да дојдат во Собрание под посебни услови. Во ситуација кога се условува кворумот додека колегите се болни, беше крајно време и таа можност да се стави во функција“,

рече Џафери и посочи дека изолирано во кабина гласаше и Арбен Зибери од ДУИ, на седницата за избор на Владата.

„Не сум јас тој што тера инает“: Џафери објасни зошто инсистирал да се затвори 32. седница пред да се гласа за мерките