Нововработените во прилепската болница биле ангажирани во кампањата за Стево Пендаровски за време на претседателските избори. Морале да го одработат вработувањето што го добиле– обвини денеска опозициската ВМРО-ДПМНЕ. На денешната прес- конференцијата емитуваа и аудио- снимка од состанок, на која, според нив, се слушаат гласовите на дел вработените во прилепската болница со двајца функционери на СДСМ – првиот човек на прилепскиот огранок на СДСМ, Миле Талески, и министерот за транспорт и врски Горан Сугарески.
На снимката, како што велат од ВМРО-ДПМНЕ, Талески ги потсетува дека партијата ги вработила, и бара „да истрчаат за партијата на претседателските избори“, притоа напоменувајќи им дека тоа треба да го сфатат како обврска, со зборовите „сите ќе бидете вклучени во новите тимови од врата до врата, и овие 6 недели нема оправдувања кој може – кој не може“. Тој од нив бара и да агитираат кај свои блиски, но и кај граѓаните воопшто.
Сугарески на крајот се согласува со се’ што кажал Талески, а им порачува на оние кои го слушаат дека тоа треба навистина да им влезе в глава.