ВМРО-ДПМНЕ се уште размислува дали да предложи нов кандидат за министер за труд и социјална политика, по разрешувањето на Рашела Мизрахи. На прашањето зошто се уште не поднеле предлог кога денес е последниот рок пред распуштање на парламентот, пратеничката од ВМРО-ДПМНЕ Благица Ласовска изјави дека ситуацијата се уште се анализира.
„Евентуално доставување нов предлог за технички министер за труд и социјална политика, а согласно Централниот и Извршниот комитет, претседателот на партијата го има овластувањето за тоа одлучување.“
– рече Ласовска.
Порталот Курир пак, повикувајќи се партиски извори веќе најави дека опозицијата најверојатно нема да предложи наследник на Мизрахи, затоа што како што велат, партијата смета дека не бил испочитуван договорот за техничка влада од страна на СДСМ.
Пратениците од ВМРО-ДПМНЕ кои ги контактираше „360 степени“ не одговорија што е планот по разрешувањето на Мизрахи, а не добивме информација ниту од партиските портпароли.
Во меѓувреме, опозицијата од прес-салата во собранието и денеска побараа исти санкции како за Мизрахи и за функционерите од власта кои го користеле терминот „Република Македонија“. Пратеничката Ласовска денеска излезе и со листа од институции каде се уште не е сменето името на дражавата и побара одговорност од сите надлежни.