ВМРО-ДПМНЕ: Лимани бега од одговорност за скандалот со водата во Гостивар

Граѓаните на Гостивар заслужуваат одговорност, а не ароганција, заслужуваат градоначалник кој ќе стои зад своите одлуки. Оттука, сметаме дека моралната одговорност и политичките последици за Валбон Лимани се неизбежни доколку сака да покаже почит кон граѓаните на Гостивар, велат од ВМРО-ДПМНЕ

Валбон Лимани, кандидатот на Филипче, Ахмети и Таравари, покажа дека за него најважно е да ја зачува функцијата, а не довербата на граѓаните, обвинуваат од ВМРО-ДПМНЕ и го повикуваат на одговорност градоначалникот на Гостивар. Во соопштението од владејачката партија наведуваат дека Лимани треба да излезе пред јавноста и да признае дека како градоначалник ја носи најголемата одговорност за случувањата во Општина Гостивар, наместо да се огради од скандалот со водата и да порача дека не чувствува никаква морална одговорност.

„Токму тоа е суштинската разлика меѓу политичарите кои преземаат одговорност и оние кои секогаш бараат изговори. Кога целиот град е погоден од ваков сериозен проблем, граѓаните не очекуваат оправдувања, туку отчетност. Ако градоначалникот не е одговорен за работата на луѓето што самиот ги поставил да раководат со јавните претпријатија, тогаш кој е? Дополнително загрижува молкот на СДС, ДУИ и Таравари. Наместо да побараат одговорност од својот кандидат, тие избраа да молчат. Очигледно, кога станува збор за нивни функционер, стандардите се менуваат, а принципите исчезнуваат’,

велат од ВМРО-ДПМНЕ.

Од ВМРО-ДПМНЕ ги повикуваат надлежните институции целосно да го расчистат случајот, без селективност и без политички калкулации и порачуваат дека никој не смее да биде заштитен од политичка или институционална одговорност.

„Граѓаните на Гостивар заслужуваат одговорност, а не ароганција, заслужуваат градоначалник кој ќе стои зад своите одлуки. Оттука, сметаме дека моралната одговорност и политичките последици за Валбон Лимани се неизбежни доколку сака да покаже почит кон граѓаните на Гостивар“,

додаваат од ВМРО-ДПМНЕ.

СДСМ бара оставки од Клековски и Андоновска – сметаат дека криеле информации за водата во Гостивар

Од опозициската СДСМ, пак, побараа оставки од министерот за здравство Сашо Клековски, директорката на Институтот за јавно здравје Марија Андоновска и од сите други одговорни лица кои, како што велат од партијата, со своето непостапување и криење информации придонеле за масовното труење на жителите на Гостивар.

Притвор за тројцата осомничени за загадувањето на водата во Гостивар

За случајот со загадувањето на водата се осомничени вршителката на должност директорка на ЈП „Комуналец“-Гостивар, Артана Асани, техничкиот раководител Леон Мезини и раководителот на Одделението за водовод, Вадедин Даути, на кои вчера на барање на ОЈО Гостивар, судија на претходна постапка од локалниот суд им одреди 30-дневен притвор. Тие се осомничени за тешки дела против животната средина и природата, предизвикани со дејствија на загадување на вода за пиење.

Не се исклучува можно проширување на истрагата и на други лица и институции за водата во Гостивар, велат од Обвинителството

Од Јавното обвинителство на брифинг со новинарите порачаа дека не се исклучува можноста од проширување на истрагата.