ВМРО-ДПМНЕ ќе поднесе ново барање за формирање анкетна комисија за трагедијата во Тетово, во кое ќе го пише новото уставно име на државата, односно ќе ја употреби придавката „Северна“.
Ова го најави лидерот на опозициската партија откако спикерот Талат Џафери вчера ја врати иницијативата како неуредна затоа што не е во согласност со амандманот 33 од Уставот, кој произлегува од Преспанскиот договор, односно предвидува дека уставното име на земјава е Република Северна Македонија.
„Ќе ја ставиме придавката, јас ќе ја трпам политичката штета. Ако мисли дека така ќе нè навлече да трпиме политичка штета, еве јас ќе се пријавам за доброволец, вистината мора да се знае и виновниците мора да се казнат“,
рече Мицкоски.
Ако тоа била вистинската причина зошто Џафери го вратил барањето, Мицкоски вели дека сега очекува да биде формирана анкетна комисија. Тој вели и дека ова не се парламентарни избори, па Собранието може да работи и во текот на кампања.
„Ова се локални, а не парламентарни избори. Нема законска необврска да се закаже комисијата. Сосема друго е тоа што спикерот Џафери рече дека веќе нема да закажува седници. Тоа значи дека тој така одлучил, а така одлучил зашто мисли дека на тој начин ќе заштити дел од рејтингот на неговата партија и коалицискиот партнер“,
истакна Мицкоски.
Во однос на модуларната болница, лидерот на ВМРО-ДПМНЕ повторно обвини дека таа била ставена на диво, пуштена во употреба на диво и приклучена на електрично напојување на диво и за сето тоа, според него, некој треба да одговара. Тој прашува и зошто правиме истраги и доаѓаат меѓународни тимови бидејќи смета дека се е јасно и нема потреба од тоа.