Оттаму прашуваат зошто Мустафаи не ја пријавила хациендата на Попова Шапка во својот анкетен лист и дали има доказ за потекло на средствата со кои е градена
Опозициската ВМРО-ДПМНЕ и денеска излезе со обвинувања за криминал на блиски луѓе на вицепремиерот Артан Груби. Од ВМРО-ДПМНЕ, преку соопштение, прашуваат како е можно „директорката на Груби“, Мерита Мустафаи, да гради хациенда на Попова Шапка со директорска плата.
„Директорката на Бирото за метрологија Мерита Мустафаи во својот анкетен лист нема пријавено имот – хациенда на Попова Шапка од 150 м2, сопственост на нејзиниот сопруг. Хациендата Мустафаи ја градат во 2020 година, а веќе следната 2021 таа е изградена. За тоа време директорката на Груби, Мустафаи, е директор на Бирото за метрологија, истото Биро кое ѝ дава акредитација на фирмата ‘Метролаб’, основана од шалтерски работник кај братот на Артан Груби, за баждарење на точила за нафтени деривати и течен нафтен гас на бензински пумпи и економски оператори кои се занимаваат со трговија на гориво“,
посочија од најголемата опозициска партија.
Оттаму прашуваат зошто Мустафаи не ја пријавила хациендата на Попова Шапка во својот анкетен лист и дали има доказ за потекло на средствата со кои е градена.
„Сомнително е што директорката на Груби, Мустафаи, има два стана во Тетово, од кој вредноста на едниот соодветствува со висината на кредитот земен истата година, но нема пријавено дополнителни средства од кои би можела да се финансира изградбата на хациендата. Директорката на Груби, Мустафаи, да каже од кои пари е направена хациендата на Попова Шапка. ДКСК и ЈО да отворат постапки“,
повикаа од ВМРО-ДПМНЕ.
Деновиве ВМРО-ДПМНЕ влезе во отворена војна со вицепремиерот Груби обвинувајќи лица блиски до него за криминал. Вчера од партијата обвинија дека братот на Груби купил деловен простор на улица „Македонија“ во вредност од половина милион евра. Од ДУИ, пак, ја обвинија ВМРО-ДПМНЕ дека е антиалбанска партија.