Милошоски ги повика пратениците на СДСМ, ЛДП, Левица, Алијанса, ДОМ, ДС… уште денеска да го стават својот потпис и да се придружат на оваа предлог-резолуција за утврдување на македонските државни позиции во однос на евроинтеграциите
Сите пратеници на ВМРО-ДПМНЕ и коалицијата ја потпишаа предлог-резолуцијата за утврдување на македонските државни позиции по однос на евроинтеграциите и блокадите кои што се наметнуваат и таа денеска е поднесена во парламентот.
Пратеникот Антонијо Милошоски изјави дека оваа предлог-резолуција е поднесена во форма во која што веќе беше споделена со сите пратеници е и предложена со цел да помине со најширок можен консензус.
„Цениме дека оваа предлог-резолуција ќе ги зајакне и македонските дипломатски позиции, но исто така ќе влијае и како фактор на сплотување, наместо поларизација, во македонското општество. Тоа што би сакал денес да го порачам и апелирам, согласно Деловникот, секој пратеник има право да се придружи со свој потпис на ваква предлог-резолуција од моментот кога таа е предложена“,
рече Милошоски.
Милошоски ги повика пратениците на СДСМ, ЛДП, Левица, Алијанса, ДОМ, Демократски сојуз и сите други пратеници, уште од денеска да го стават својот потпис и да се придружат на оваа предлог-резолуција за утврдување на македонските државни позиции за евроинтеграции, се со цел да не се дозволи блокадите и „националните понижувања“ да станат предмет на преговори и „виткање кичма“ во некој следен период.
„Се надевам дека пратениците и партиите кои декларативно истакнаа дека ќе ја поддржат резолуцијата таква каква што е, од денес па во следните неколку дена истата ќе ја потпишат и очекуваме претседателот на Собранието Џафери, во најскоро можно време истата да ја стави на пленарна седница за да можеме да се изјасниме, очекувајќи дека ќе имаме широк политички консензус“,
истакна Милошоски.
Милошоски рече дека за да се донесе Резолуцијата потребно е просто мнозинство, но оти целта на опозициската партија е што повеќе пратеници да ја поддржат.
„Во државата секогаш граѓаните биле солидарни едни кон други без разлика на политичката партија или етничката припадност, меѓутоа оваа резолуција заслужува широка поддршка. Доколку не се работи за смислена тактика на СДСМ и ДУИ, едните декларативно да поддржуваат а другите процедурално или содржински да кочат, ако за тоа станува збор тогаш ќе се примети таквото однесување, затоа за а се биде на чисто ние повикуваме уште денеска секој пратеник кој што декларативно се изјаснил дека ја поддржува содржината на оваа резолуција да го стави својот потпис на истата за таа да може да добие поголема тежина и со тоа да се очекува поширок политички консензус“,
рече Милошоски.
Очекувањата се дека пратениците на СДСМ, ДОМ, Левица, ДС и ЛДП кои се изјаснија за декларацијата да ги стават потписите на овој документ и во најскоро време да се изгласа.