Ова е одговорот на Димитриеска-Кочоска по анализите на граѓанските организации дека зголемувањето на сумата за финансирање на партиите од 0,06% на 0,15% од изворните приходи на буџетот, не ја одиграло примарната улога – да ги намали приватните донации кои се сметаат за ризик за корупција
ВМРО-ДПМНЕ има сериозни намалување на донациите кои доаѓаат од физички и правни лица, вели Гордана Димитриеска-Кочоска, потпретседателката на партијата и претседателка на Комисијата за надзор за материјално- финансиското работење на ВМРО-ДПМНЕ. Одговорот на Димитриеска-Кочоска доаѓа по анализите на граѓанските организации дека зголемувањето на сумата за финансирање на партиите од 0,06% на 0,15% од изворните приходи на буџетот, не ја одиграло примарната улога – да ги намали приватните донации кои се сметаат за ризик за корупција.
„Јас, во моментов, можам да зборувам за состојбите во ВМРО-ДПМНЕ, навистина, не ги следам другите политичките партии и извештаи. Можам најодговорно да кажам дека во ВМРО-ДПМНЕ имаме сериозни намалување на донациите што доаѓаат од физички и правни лица. И тоа го констатира и Државниот завод за ревизија, од каде што може јасно да се види дека донациите од физички лица се сериозно намалени, да не речам за 3-4 пати. Ако се вратаме на 2018 и 2019 година, кои се можеби најубав репер, бидејќи во 2020 се смени законот и може да се префрлаат донации од редовна сметка на изборна, тогаш можеме да видиме дека во ВМРО-ДПМНЕ имаме драстично намалување на донации од физички лица“,
вели Димитреска Кочоска, која беше една од учесничките во вечерашната дебата во „360 степени“ на ТВ Алсат.
Димитриеска-Кочоска се согласува дека Изборниот законик и Законот за финансирање на политички партии имаат одредени недоречености, но вели дека така е и со многу други закони. За забелешката дека независните кандидати не добиваат поддршка од државниот буџет, таа смета дека треба да добиваат, но вели и дека големите партии не го земаат најголемиот дел од „колачот“.
„215 милиони денари во оваа прва фаза беа исплатени преку трезорот за политичките партии, од кои ВМРО-ДПМНЕ и СДСМ, како најголеми политички партии, добија некаде 88 милиони денари и плус нешто помалку од 6 милиони денари за аналитичко-истражувачки центар, што значи, кога ќе ги соберете овие износи, двтее најголеми партии добиваат помалку од 50 проценти од парите кои што се предвидени. Во континуитет кога ќе оди исплатата за политичките партии, првата галама што се прави е колку добиле. Ние сме голема политичка партија, со многу советници, има методологија на исплата, голем број пратеници и логично е да е така. Но, кога ќе ги погледнете математиките како се прави тоа, не е дека овие партии добиваат најмногу средства од вкупниот износ што е наменет“,
вели Димитриеска-Кочоска.
Потпретседателката на ВМРО-ДПМНЕ нема ништо против промени и унапредувања на системот, иако смета дека ВМРО-ДПМНЕ е транспарентна, а институциите имаат пристап до трансакциите на партијата.
„Ние, како ВМРО-ДПМНЕ, во 2020 година сме единствена политичка партија што има позитивен ревизорски извештај за предвремените парламентарн избори. Да не е случајот со замрзнување на имотот и судскиот спор, јас верувам дека и во делот на редовната сметка би имале, исто така, чист ревизорски извештај зашто мислам дека во последните четири години навистина напорно работиме во овој дел и, на крајот од денот, што и да се одлучи од аспект како ќе се контролира тоа – ние сме отворени за соработка. Сите документи се тука, немаме што да скриеме“,
порача Димитриеска-Кочоска.