Поради немање кворум, денеска не почна седницата на собраниската Комисија за политички систем и односи со заедниците, на која требаше да се разгледаат предлог измените на Кривичниот законик со кои се бара продолжување на рокот за застарување на кривичните дела, особено на оние што се однесуваат на злоупотреба на службената положба и предлогот за измена на Изборниот законик со кој се бара една изборна единица наместо сегашните шест, потоа отворени листи за советници и еднаков број мажи и жени на листите.
Почетокот прво беше пролонгиран за два и пол часа, но на крај седницата беше одложена.
Според претседателот на Комисијата Александар Кирацовски, кој е предлагач на измените за продолжување на рокот за застарување на кривичните дела, неприсуството на пратениците од ВМРО-ДПМНЕ и ДУИ значи кочење на процесите кои треба да доведат до ефикасна правда.
„Доколку ова законско решение не се донесе, постои можност да застарат и предметите на голем дел од сторителите на кривични дела со злоупотреба на службената положба кои биле од претходната или се дел од актуелната власт. Дополнително, за апсурдот да биде поголем, со избегнување на ова законско решение се остава можност лицата што се спасиле од кривична одговорност поради застареноста на предметот на крај да излезат и ‘жртви’ и преку барање до Врховниот суд да издејствуваат отштета за необезбеденото судење во разумен рок“,
рече Кирацовски на прес-конференција по завршување на седницата.
Тој не сакаше да коментира дали станува збор за заемен договор меѓу двете партии, но, како што рече, нивното денешно дејствување е камен на сопнување и кочење на законските решенија кои овозможуваат поефикасен судски процеси.
Пратеничката Лилјана Поповска од ДОМ, која е дел од предлагачите на измените на Изборниот законик, овој процес е блокиран поради поднесените 6.000 амандмани поднесени од пратениците на ВМРО-ДПМНЕ и ДУИ.
„Очигледни ќе беа придобивките во поглед на демократизацијата на земјата, но овој процес е блокиран со 6.000 апсурдни амандмани. Апсурдни бидејќи колегите од ДУИ предлагаат одложување на рокот на важење за кои 50-ина години, а колегите од ВМРО-ДПМНЕ предлагаат одложување за 10 години. Ова се амандмани кои сите заедно би можеле да се сведат на три до пет амандмани и доколку постоеше политичка волја ќе можеме да разговараме и да донесеме заеднички решенија. Очигледно е дека партиите што го блокираат ова не сакаат да се откажат од можноста да доминираат на политичката сцена“,
рече Поповска.
*Поврзана вест