Премиерот вели дека опозицијата за секое назначување на функционер има напади и затоа вели дека тоа што се тврди треба да се провери, но во соодветните институции
По прозивките дали новиот директор на Агенцијата за национална безбедност (АНБ), Зарко Милошевски, имал погрешна процена за Диво Насеље, од ВМРО-ДПМНЕ втор ден прашуваат и каква е неговата улога во настаните од 27 април 2017 година кога се случи упадот во Собранието.
Прашањето од опозициската партија го упатуваат бидејќи, како што велат, во тој период Милошевски бил началник за екстремизам во тогашната УБК.
„Зарко Милошевски е началник во единицата за борба против екстремизам во УБК во време на настаните од 27 април 2017 година и тоа од власта не го негираат. Ако бил, зошто Милошевски не беше обвинет исто како и други лица за настаните, кои обвинителството ги класифицираше како тероризам? Дали и каква улога имал Милошевски во настаните од 27 април 2017 година? Дали и како постапувал Зарко Милошевски во тој период? Да посетиме, Зарко Милошевски има голем негативен багаж во својата кариера. Имено тој е потписникот на документот со кој му се овозможило државјанство на Онишченко, лицето од американската црна листа. Исто така, Милошевски бил Помошник директор во АНБ и кога 215 криминалци од регионот и светот добиваат македонски патни исправи“,
велат од ВМРО-ДПМНЕ.
Оттаму обвинуваат и дека тој бил началник во УБК во периодот со кој се поврзува и скандалот со нелегалното прислушување.
Премиерот Димитар Ковачевски, пак, и денеска повтори дека станува збор за професионалец, а одговори на прашања рече дека треба да дадат други служби кои не се дел од Владата.
„За директор на АНБ избран е професионалец кој од 1997 година работи во службата и тоа напредувал во својата кариера во истата служба и притоа посетувал многубројни обуки кои се доминантно во САД и Канада. Во однос на наодите кои ги дава опозицијата, тоа може да се провери, но врз основа на соодветни институции. Опозицијата по назначување на секој функционер има напади, јас барем знам за што се мене ме напаѓаа, дури споменуваа и мртви роднини, така што одговорот на тоа прашање најдобро ќе може да ви го дадат во соодветните служби кои се занимаваат со истраги, а тоа се служби што не се дел од Владата“,
изјави денеска Ковачевски.