Семејното насилство што наводно го извршил генералниот секретар на Градот, според ВМРО-ДПМНЕ, која се повика на евиденцијата од Министерството за внатрешни работи (МВР), се случило во два наврата. Едното пред речиси 16 години, во 2007 година, а второто во 2017 година
Опозициската ВМРО-ДПМНЕ денеска преку писмено соопштение го обвини за семејно насилство генералниот секретар на Град Скопје, Зоран Глигоров. Оттаму го повикаа Глигоров да се произнесе во врска со нивните обвинувања, а ако сознанијата на партијата се покажат точни, од ВМРО-ДПМНЕ посочија оти институциите треба да постапат и да го разрешат од функцијата.
Семејното насилство што наводно го извршил генералниот секретар на Градот, според ВМРО-ДПМНЕ, која се повика на евиденцијата од Министерството за внатрешни работи (МВР), се случило во два наврата. Едното пред речиси 16 години, во 2007 година, а второто во 2017 година.
„Очекуваме јавноста да добие одговор дали е точно дека според евиденцијата на МВР, Зоран Глигоров, бил пријавуван за семејно насилство? Дали на 25.6.2007 година Глигоров е пријавен за тешка телесна повреда врз женско лице со иницијали Л.Г. нанесени преку повеќе удари и изненаден напад? Второ, дали на 12.3.2017 година Глигоров е пријавен за нанесување на телесна повреда при вршење на семејно насилство врз Љ.Г. преку повеќе удари и изненаден напад?“,
се наведува во соопштението на ВМРО-ДПМНЕ.
Ова, според партијата, се сериозни информации кои треба да се земат предвид и да бидат одговорени пред јавноста бидејќи, како што велат, доколку се точни, тоа е сериозен проблем.
Дополнително, повикувајќи се на написи во дел од медиумите, од ВМРО-ДПМНЕ додаваат дека Глигоров пред два дена се пресметувал со вработен во обезбедувањето на Град Скопје.