Комисијата за здравство на ВМРО-ДПМНЕ вечерва вонредно заседаваше за состојбата со коронавирусот. Тие наведуваат неколку барања до Владата за да се превенира ситуацијата од ширење на заразата.
Тие бараат распуст за децата од предучилишна и училишна возраст, како и строго евидентирање на сите лица кои влегуваат во државава од кризни зони со коронавирус.
„Контрола и ограничување на прегледите и интервенциите кои не се со итност со цел да се растерети терциерното здравство и да биде подготвено да одговори на ситуацијата како и да се заштитат пациентите и медицинските лица. Надлежните институции, Центар за управување со кризи, Државен здравствен санитарен инспекторат, Комисијата за заразни болести да ги спроведуваат доследно своите надлежности и јавно да претстават акциски планови за делување“,
дополнуваат од ВМРО-ДПМНЕ.
Тие бараат одговорност од министерот за здравство Венко Филипче, односно, оставка како морален чин. Според нив, постојат пропусти во постапувањето на државните органи во справување со вирусот, како и доцна реакција на надлежните во врска со коронавирусот.
„Се доведува во прашање ефикасноста на проверката на потенцијално заболени од корона вирус при влез во државата. Владата и министерството затајуваат во справувањето со вирусот. Ситуацијата е загрижувачка дополнително, бидејќи дел од медицинскиот персонал е веќе во изолација по денешниот случај со доктор Нина Цаца Биљановска, директор на Клиниката за дерматологија која е носител на вирусот“,
се вели во соопштението.